अखबार नेपाल ट्रेन्डिङ

युइएफए युरोपा लिग फुटबलमा इटालियन क्लब नेपोलीले सहज जित निकाल्दा इंग्लिस क्लब आर्सनलले लज्जास्पद हार बेहोरेको छ ।

युरोपा लिग अन्तरगतको प्रि-क्वाटरफाइनलको पहिलो लेगमा नेपोलीले अष्ट्रियाको साल्जवर्गलाई ३-० ले पराजित गरेको हो । नेपोलीको सहज जितमा अर्कडिउज र फावियनले गोल गरे भने एक गोल उपहार पाएको थियो ।

घरेलु मैदानमा गएराति भएको खेलमा १०औं मिनेटमा अर्कडिउजको गोलबाट नेपोलीले खेलमा अग्रता बनाएको थियो । १८औं मिनेटमा फावियनले जोसे मारिया कालेजोनका पासमा गोल गर्दै अग्रता दोब्बर बनायो । ५८औं मिनेटमा जेरोमीले आत्मघाती गोल गरेपछि नेपोली ३-० ले अघि बढ्यो ।

त्यसपछि थप गोल निस्कन नसक्दा नेपोली ३-० ले विजयी हुन सफल भयो । युरोपा लिगकै अर्को खेलमा १० खेलाडीमा समेटिएको इंग्लिस क्लब आर्सनलले फ्रेन्च क्लब रेनिससँग ३-१ को लज्जास्पद हार ब्यहोरेको छ । रेनिसको मैदानमा आर्सनलले खेलको चौथो मिनेटमा एलेक्स इओवीको गोलबाट अग्रता बनाएको थियो । ४१औं मिनेटमा आर्सनल १० खेलाडीमा समेटिन पुग्यो ।

सोक्रेट्स दोहोरो पहेलो कार्ड खादै मैदान बाहिरिए । ४२औं मिनेटमा बेन्जामिनले गोल गर्दै खेललाई १-१ गोलको बराबरीमा ल्याए । ६५औं मिनेटमा नाचो मोनरियलले आत्मघाती गोल गरेपछि घरेलु टोलीले खेलमा २-१ को अग्रता बनायो । ८८औं मिनेटमा इस्मैला सारले गोल गर्दै रेनिसलाई ३-१ को जित दिलाए ।