अखबार नेपाल ट्रेन्डिङ

काठमाडौं: सहिद स्मारक ए डिभिजन लिगमा आज दुई खेलहरु हुँदैछन् । लिगको दशौ खेलमा सरस्वती युथ क्लब र जावलाखेल युथ क्लबबीच प्रतिस्पर्धा हुनेछ । खेल सातदोबाटोस्थित एन्फा कम्प्लेक्समा मध्यान्न १२ बजे सुरु हुनेछ । त्यस्तै दिनको दोस्रो खेलमा गत सिजनको उपबिजेता संकटा क्लब र न्युरोड टिम एनआरटीबीच प्रतिस्पर्धा हुनेछ । खेल दशरथ रंगशालामा खेल दिउँसो ३ बजे सुरु हुनेछ ।

लिगको पहिलो खेलमा सरस्वती युथ क्लबले एनआरटीसंग ४–० को फराकिलो हार ब्यहोरेको थियो । पहिलो खेलमै फराकिलो अन्तरले पराजित सरस्वतीले लिगको दोस्रो खेलमा दबाब महशुश गरेको छ । सरस्वती जस्तै एनआरटीले लिगमा शीर्ष ६ भित्र पर्ने लक्ष्य राखेको थियो तर पहिलो खेलमै स्तब्ध बनेपछि सरस्वतीले दबाब महशुश गरेको छ । यस्तो अवस्थामा सरस्वतीले जावलाखेल युथसंग प्रतिस्पर्धा गर्दैछ । दुबै क्लब स्पष्ट तीन अङ्क जोड्ने लक्ष्य सहित मैदान उत्रने तयारी गरेका छन् ।

यता न्युरोड टिम एनआरटीले लिगको पहिलो खेलमै प्रभाबशाली जित निकालिसकेको छ । राष्ट्रिय टिम समेत हेरिसकेका राजुकाजी शाक्यको नेतृत्वमा रहेको एनआरटीले सरस्वती युथ क्लबलाई पराजित गरेको थियो । पहिलो खेलमै सुखद सुरुवात गरेको एनआरटीले आज गत सिजनको लिगको उपविजेता संकटा क्लबसंग प्रतिस्पर्धा गर्दैछ । पहिलो खेलमा च्यासलसँग हारेको संकटा अंक जोड्ने लक्ष्य सहित मैदान उत्रन चाहन्छ । लिगको सुरुको खेलमा बिदेशी खेलाउन नपाएको संकटा एनआरटीविरुद्व विदेशी कोटाका खेलाडी उतार्ने योजनामा छ ।