अखबार नेपाल ट्रेन्डिङ

काठमाडौं: १३औं दक्षिण एसियाली खेलकुद साग अन्तर्गत पौडीमा नेपालकी गौरिका सिंहले कीर्तिमानी चौंथो स्वर्ण पदक जितेकी छिन् । सातदोबाटोस्थित पौडी पोखरीमा सोमबार भएको महिला १ सय मिटर फ्रिस्टाइलमा गौरिकाले स्वर्ण जितेकी हुन् ।

स्वर्ण जित्ने क्रममा गौरिकाले ५८ दशमलव १३ सेकेण्डको समयमा दुरी पुरा गरेकी थिइन् । भारतकी शिवांगी शर्माले रजत जितिन् । योसंगै गौरिकाले एकै सागमा चार स्वर्ण जितेर कीर्तिमान बनाएकी छिन् । यसअघि १७ वर्षीय ओलम्पियन गौरिकाले ४ सय मिटर फ्रिस्टाइल, २ सय मिटर ब्याकस्ट्रोक र २ सय मिटर फ्रिस्टाईलमा स्वर्ण जितेकी थिइन् । यस्तै साग खेलकुदको ईतिहासमा नेपालका लागि सवार्धिक ४ स्वर्ण जित्ने खेलाडीको कीर्तिमानसँग पनि गौरिकाले बराबरी गरेकी छिन् ।

उनले तेक्वान्दोका दिपक बिष्टको कीर्तिमान बराबरी गरेका हुन् । दिपकले चार संस्करणमा कूल ४ स्वर्ण जितेका थिए । तर, गौरिकाले भने एकै संस्करणमा दिपकलाई भेट्टाएकी छिन् । गौरिकाले ४ स्वर्णसहित २ रजत र २ कास्य पनि जितिन् । गौरिकाको स्वर्णसंगै नेपालको स्वर्ण संख्या ४९ पुगेको छ । यस्तै पौडीको महिला ४ सय मिटर मिड्लेको रिलेमा नेपालले कास्य जितेको छ ।