अखबार नेपाल ट्रेन्डिङ

काठमाडौं: त्रिपुरेश्वरस्थित दशरथ रंगशालामा जारी साफ महिला क्लब च्याम्पियनसिपमा आज नेपाल एपिएफ क्लब र इस्ट बङ्गाल फुटबल क्लबले लिगको अन्तिम खेल खेल्दैछन् । यी दुईबीचको खेल साँझ ६ बजे हुनेछ ।

राउन्ड रोविन लिगको एक खेलअगावै यी दुई टोलीले फाइनल समीकरणमा आफ्नो स्थान सुरक्षित गरेका हुन् । लिगको अन्तिम खेलमासम्म आईपुग्दा दुबै टोली प्रतियोगितामा अपराजित छन् । पछिल्ला तीन खेलमा एपिएफले सात अंक जोड्दा इस्ट बङ्गालले शतप्रतिशत जित हासिल गरेको छ ।

इस्ट बङ्गालले प्रतियोगितामा सर्वाधिक १३ गोल गरेको छ । एपिएफले पछिल्ला दुई खेलमा गोलका लागि निकै संघर्ष गर्नुपरेको छ । पहिलो खेलमा नासरिनको चुनौती ४–० गोल अन्तरले पन्छाएको एपिएफले त्यसपछि एक गोल गर्न सक्यो ।

दक्षिण एसियाली फुटबल महासंघ (साफ) ले पहिलो पटक आयोजना गरेको च्याम्पियनसिपमा ५ सदस्य राष्ट्रको लिग च्याम्पियनको सहभागिता छ । सिंगल राउन्ड रोबिनपछि शीर्ष २ टोलीले फाइनल खेल्नेछन् ।

च्याम्पियनसिपको विजेताले १० हजार अमेरिकी डलर र उपविजेताले ५ हजार अमेरिकी डलर तथा बाँकी तीन टोलीले समान २ हजार अमरिकी डलर प्राप्त गर्नेछन् । एन्फाले प्रतियोगिताको लागि दुई खालको टिकटदर कायम गरेको छ । साधारणतर्फ ३०० र भीआईपीतर्फ ५०० को टिकट मूल्य राखिएको छ ।