अखबार नेपाल ट्रेन्डिङ

काठमाडौं: एएफसी एसियन कप २०२६ अस्ट्रेलिया पुग्न नेपाली महिला राष्ट्रिय फुटबल टोलीलाई उज्बेकिस्तानसँगको खेलमा बराबरीको नतिजाले पर्याप्त नहुने भएको छ । बुधबार सम्पन्न समूह ‘एफ’को दोस्रो खेलमा घरेलु टोली उज्बेकिस्तानले लाओसलाई ७-० ले हराएसँगै खेल जटिल मोडमा पुगेको हो । नेपालले पनि बुधबार नै भएको खेलमा श्रीलंकामाथि ८-० को जित निकालेको थियो ।

योसँगै अपराजित रहेका नेपाल र उज्बेकिस्तानले समान २ खेलबाट ६ अंक पुर्‍याएका छन् । दुवै टोलीको गोलअन्तर पनि समान १७ रहेको छ । लाओस र श्रीलंका भने एक अगाबै प्रतियोगिताबाट बाहिरिएका छन् । नेपालले पहिलो खेलमा लाओसलाई ९-० ले हराएको थियो । उज्बेकिस्तानले भने श्रीलंकामाथि १०-० को जित निकालेको हो । एएफसीको नियमअनुसार दुई टोलीको समान अंक र गोल भएमा अस्ट्रेलिया पुग्ने टोलीको टुंगो पेनाल्टी सुटआउटमार्फत गरिने छ ।

गोल गरेको र गोल खाएको गोलको मूल्यांकन गर्दै शीर्ष स्थानको निर्धारण गरिनेछ । तर, सबै पक्षमा समान भए सिधै पेनाल्टी सुटआउटबाट एसियन कपमा पुग्ने टोलीको निर्धारण गरिने छ । यदि शनिबार उज्बेकिस्तान र नेपालबीच हुने खेल बराबरीमा सकिना साथ पेनाल्टी सुटआउटमा जाने छ । त्यसैले यो खेल रोमाञ्चक हुने अपेक्षा गरिएको छ ।

यसैबीच ऋतुपोर्णा चक्माको दुई गोलसँगै बंगलादेश पहिलोपटक एएफसी महिला एसियन कपमा छनोट भएको छ । बुधबार याङगुनको थुवुन्ना रंगशालामा भएको समूह ‘सी’ को दोस्रो खेलमा बंगलादेशले म्यानमारलाई २-१ गोल अन्तरले हराएको छ । यो जितसँगै बंगलादेश २ खेलमा ६ अंक जोड्दै तालिकाको शीर्ष स्थानमा छ । अब शनिबार समूह चरणको अन्तिम खेलमा तल्लो वरीयताको तुर्कमेनिस्तानविरुद्ध खेल्नेछ । अर्कोतर्फ म्यानमारको ३ अंक छ । अब उसले शनिबार बहराइनसँग खेल्नेछ । हालसम्म एएफसी महिला एसियन कपमा कहिल्यै सहभागी नभएको बंगलादेशका लागि यो ऐतिहासिक उपलब्धि बनेको छ ।