अखबार नेपाल ट्रेन्डिङ

काठमाडौं: एएफसी महिला एसियन कप छनोट अन्तर्गत नेपालले आज श्रीलंकासँग खेल्दैछ । खेल साँझ ६:१५ बजे सुरु हुनेछ । चौथोपल्ट एसियन कप खेल्ने लक्ष्य बोकेर उज्बेकिस्तान पुगेको नेपाली टोलीले पहिलो खेलमा लाओसलाई ९-० गोल अन्तरले हराएको थियो ।

नेपालको जितमा कप्तान सावित्रा भण्डारी साम्बा एक्लैले ५ गोल गरेकी थिइन् । योसँगै उनको अन्तर्राष्ट्रिय गोलसंख्या ६२ पुगेको छ । श्रीलंकाले भने घरेलु टोलीसँग १०-० गोलको फराकिलो हार बेहोरेको थियो । अहिलेसम्म नेपाल र श्रीलंका १० पटक आमुन्नेसामुन्ने भएका छन् । ती सबै खेलमा नेपालले जित हाँसिल गरेको छ ।

नेपालले श्रीलंकामाथि ३० गोल गरेको छ । तर, अहिलेसम्म कुनै गोल खान परेको छैन । त्यसैले समूह एफमा उज्बेकिस्तान १ गोलले पछाडि परेको नेपाललाई श्रीलंकामाथि गोल वर्षाउँदै अगाडि बढ्ने मौका छ । उज्बेकिस्तानले बुधबार नै लाओससँग खेल्नेछ । यी दुई खेलले शीर्ष स्थानमा रहने र पुग्ने टोलीको टुंगो लगाउने छ । त्यसपछि उज्बेकिस्तान र नेपालबीच हुने खेलले अस्ट्रेलिया जाने टोलीको निर्णय लगाउनेछ ।