अखबार नेपाल ट्रेन्डिङ

काठमाडौं: नेपालले सिंगापुरलाई अन्तर्राष्ट्रिय मैत्रीपूर्ण खेलमा पराजित गरेको छ । सिंगापुरको राष्ट्रिय रंगशालामा भएको खेलमा नेपाल १-० गोल अन्तरले विजयी भएको हो । नेपालको ऐतिहासिक जितमा फरवार्ड जिलेस्पी जंग कार्की नायक बने । सिंगापुरको सिनियर पुरुष राष्ट्रिय टोलीमाथि नेपालको यो पहिलो जित हो ।

नेपालका लागि जिलेस्पीले खेलको १२औं मिनेटमा गोल गरेका थिए । मनिष डाँगीले दाया विंगबाट दिएको पासलाई उनले पहिलो टचमै गोलमा परिणत गरेका थिए । जिलेस्पीको राष्ट्रिय टोलीबाट यो तेस्रो गोल हो । उनकै निर्णायक गोलमा नेपालले ३६ वर्षपछि सिंगापुरलाई पराजित गरेको हो । त्यो पनि उसैको मैदानमा ।

नेपाल र सिंगापुर सन् १९८९ पछि आमुन्ने सामुन्ने भएका हुन् । ५ जुन १९८९ मा भएको पछिल्लो भेटमा सिंगापुरले नेपाललाई ७–० को नमिठो हार चखाएको थियो । त्यसअघि भएका दुई भेट १९८२ र १९८९ मा भने नेपालले यति ठूलो हार बेहोरेको थिएन । त्यो हार २–० र ३–० ले पराजतित भएको थियो । तर, यसपल्ट भने फिफा वरीयतामा आफूभन्दा १५ स्थान १६०औं रहेको सिंगापुरलाई नेपालले १२औं मिनेटमै जेलेस्पीले गरेको गोल नै काफी रह्यो ।

प्रतिस्पर्धात्मक खेलमा नेपालले अन्य अवसर पाएपनि सदुपयोग भने गर्न सकेन । यता सिंगापुरले खेलको अन्तिम समयमा प्राप्त सुवर्ण अवसरमा कप्तान किरण चेम्जोङले उत्कृष्ट बचाउ गर्दै नेपालको अग्रता कायम राखेका थिए । प्रशिक्षक म्याट रसको पहिलो अधिकारिक खेलमा नेपालले विजयी सुरुवात गरेको हो ।

नेपालले एएफसी एसियन कप छनोट खेल्ने तयारीमा क्रममा मैत्रीपूर्ण खेल खेलको हो । अब नेपालले एसियन कप छनोटको तेस्रो चरणमा मलेसियाको सामना गर्नेछ । यस समूहमा भिएतनाम र लाओस पनि छन् । शीर्षस्थानमा रहेको टोलीले एसियन कप खेल्नेछ । सिंगापुरको समूहमा भने भारत, हङकङ र बंगलादेश छन् । सिंगापुरले पहिलो खेलमा हङकङको सामना गर्नेछ ।