अखबार नेपाल ट्रेन्डिङ

काठमाडौं: सिद्धार्थ बैंक नेपाल प्रिमियर लिग (एनपिएल) मा आज दुई खेलहरु हुदैछ । पहिलो खेल लुम्बिनी लायन्स र जनकपुर बोल्ट्सबीच खेल हुदैछ । कीर्तिपुरस्थित टियु मैदानमा खेल बिहान ९ बजे सुरु हुनेछ ।

लुम्बिनीले सुरुवाती तीन खेलमा हार बेहोरेर दबाबमा छ । आजको खेलमा जित हात नपारे लुम्बिनीको प्लेअफ सम्भावना कठिन बन्नेछ । पहिलो खेलमा विराटनगर किंग्ससँग हारेको लुम्बिनीले पोखरा एभेन्जर्स र सुदूरपश्चिम रोयल्सविरुद्धको खेल पनि गुमाएको थियो । जनकपुर भने लगातार चौथो जित निकाल्दै प्लेअफ सम्भावना थप बलियो बनाउन चाहान्छ । जनकपुरले विराटनगर, कर्णाली तथा पोखरालाई पराजित गरेको थियो ।

आजै हुने दोस्रो खेलमा सुदूरपश्चिम रोयल्स र चितवन राइनोजबीच प्रतिस्पर्धा हुनेछ । खेल दिउँसो १ बजे सुरु हुनेछ । सुदूरपश्चिम लगातार चौथो जित निकाल्दै प्लेअफ सम्भावना बलियो बनाउने लक्ष्यमा रहेको छ । सुदूरपश्चिमले पहिलो खेलमा विराटनगर, दोस्रोमा काठमाडौं गुर्खाज र तेस्रो खेलमा लुम्बिनीलाई पराजित गरेको थियो । सुरुवाती दुई खेल जितेको चितवन पछिल्लो खेलमा भने पराजित भएको थियो । काठमाडौं र पोखरालाई पराजित गरेको चितवन तेस्रो खेलमा कर्णालीसँग हारेको थियो ।