अखबार नेपाल ट्रेन्डिङ

काठमाडौं: साफ महिला च्याम्पियनसिप २०२४ अन्तर्गत आज पहिलो सेमिफाइनलमा साबिक विजेता बंगलादेश र भुटान भिड्नेछन् भने आजै हुने दोस्रो खेलमा घरेलु टोली नेपाल र भारत भिड्नेछन् ।

दशरथ रंगशालामा हुने खेल बंगलादेश र भुटानविरुद्धको पहिलो सेमिफाइनल १:३० बजे हुनेछ । तर, नेपाली समर्थकको अत्यधिक पर्खाइमा रहेको नेपाल र भारतबीचको खेल साँझ ६:३० बजे हुनेछ । नेपाल र भारत लगातार दोस्रो पटक सेमिफाइनलमा भिड्न लागेका हुन् । पछिल्ला संस्करणमा नेपालले भारतलाई हराएर साफ महिला च्याम्पियनसिपको फाइनल खेलेको थियो । जुन भारतविरुद्ध नेपालको पहिलो जित थियो । त्यसपछि नेपालले भारतविरुद्ध लगातार सानदार प्रदर्शन गर्दै आएको छ ।

पछिल्ला तीन खेलमा भारतसँग नेपाल हारेको छैन । समग्रमा भने नेपालमाथि भारत हाबी छ । यी दुईबिच भएका कुल १७ भिडन्तमा भारतले ११ र नेपालले दुई खेलमा जित हात पारेका छन् । साफमै पनि चार पटक फाइनल र एक पटक सेमिफाइनलमा नेपाल भारतसँग पराजित भएको छ ।

यस प्रतियोगिताको समूह चरणमा बङ्गलादेशसँग ३–१ ले हारेर भारतले समूह ‘ए’ उपविजेता बनेको थियो । जसको फाइदा नेपाललाई सेमिफाइनलमा हुन सक्छ । नेपाल हजारौँ घरेलु दर्शकको र मैदानको फाइदामा खेल्दै छ । पछिल्ला दुई खेलमा १७ गोल गरेपछि नेपाली स्ट्राइकरहरू अहिले उच्च मनोबलमा छ ।

पहिलो खेलमा भुटानसँग गोलरहित बराबरीमा रोकिएको नेपाल बाँकीका दुई खेलमा तुलनात्मक रूपमा कमजोर मानिएका माल्दिभ्सलाई ११–० र श्रीलङ्कालाई ६–० ले हराएर समूह ‘बी’ विजेता बनेको हो । त्यसैले यस प्रतियोगितामा नेपालको वास्तविक परीक्षा भारतविरुद्ध हुने छ ।