अखबार नेपाल ट्रेन्डिङ

काठमाडौं: काभा नेसन्स वुमन्स लिग अन्तर्गत समूह चरणको अन्तिम दुई खेल आज हुँदैछ । त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा पहिलो खेलमा दिउँसो १ बजे भारत र श्रीलंका तथा दोस्रो खेलमा अपराह्न ३ बजे नेपाल र माल्दिभ्सबीच प्रतिस्पर्धा हुँदैछ ।

जारी लिगमा नेपाल उत्कृष्ट लयमा थियो । नेपालले लिगको पहिलो खेलमा श्रीलंकालाई ३-० को सोझो सेटमा जितेको थियो । दोस्रो खेलमा उपाधिको दाबेदार भारतमाथि ३-२ को रोमाञ्चक जित हासिल गर्दै नेपालले सेमिफाइनल स्थान सुरक्षित गरेको थियो । तर, आइतबार भएको तेस्रो खेलमा भने नेपालले अपेक्षा गरे अनुसार प्रदर्शन गर्न सकेन र इरानलाई ३-२ ले नतिजा सुम्पियो ।

सात अंक सहित भारत शीर्ष स्थानमा छ । समान अंकसहित इरान दोस्रो स्थानमा छ । यद्यपि, भारतले एक खेल कम खेलेको छ । भारतले लिग चरणको अन्तिम खेल सोमबार नै श्रीलंकासँग खेल्ने छ । श्रीलंकालाई पराजित गरे भारतले फाइनल प्रवेशका लागि सेमिफाइन यही टोलीसँग खेल्ने लगभग पक्का हुनेछ ।

लिगको शीर्ष स्थानमा रहने र चौथो हुने टोली तथा दोस्रो स्थानको र तेस्रो स्थानको टोलीबीच सेमिफाइनलमा प्रतिस्पर्धा हुनेछ । श्रीलंका ४ अंकसहित चौथो स्थानमा छ । ६ अंक जोडेको नेपाल तेस्रो स्थानमा छ । यदि श्रीलंकाले भारतलाई पराजित गरे र प्रतियोगिताबाट बाहिरिइसकेको माल्दिभ्समाथि नेपालले जित हासिल गरे समिकरण बद्लिन सक्छ । तर, भारत पराजित नभए नेपालले सेमिफाइनलमा इरानकै सामना गर्नुपर्ने हुन्छ । अहिलेसम्मको समिकरण हेर्दा नेपालले सेमिफाइनलमा इरान र भारतले श्रीलंकाको सामना गर्ने लगभग पक्का भइसकेको छ ।