अखबार नेपाल ट्रेन्डिङ

एजेन्सी: इङ्ल्यान्डलाई २-१ गोल अन्तरले पराजित गर्दै स्पेनले युरोकप २०२४ को उपाधि जितेको छ । बर्लिनमा भएको फाइनलको दोस्रो हाफको सुरुवातमै स्पेनका लागि युवा खेलाडी लामिन यमालको पासमा निको विलियम्सले गोल गर्दै खेलमा सुरुवाती अग्रता लिएको थियो ।

खेलको ७३औं मिनेटमा इङ्ल्यान्डले कोल पालमरको गोलमा बराबरी गर्यो । तीन मिनेट अघि मैदान प्रवेश गरेका उनले बक्स बाहिरबाट उत्कृष्ट गोल गरे । ८६औं मिनेटमा स्पेनले विजयी गोल गर्यो । मार्क कुकुरेलाको क्रसमा मिकेल ओयारजाबालले गोल गर्दै स्पेनलाई जित दिलाए ।

स्पेनले पहिलोपल्ट सन् १९६४ मा युरो कप जितेको थियो । त्यसपछि स्पेन तीन सिजन छनोट हुन सकेन । १९८४ मा फाइनलमा पराजित भएको स्पेनले दोस्रो उपाधि जित्न २४ वर्ष कुर्न परेको थियो । स्पेनले २००८ मा स्विट्जरल्यान्ड आयोजित प्रतियोगितामा जर्मनीलाई पराजित गरेको थियो । त्यसको चार वर्षपछि पोल्यान्ड र युक्रेनले संयुक्तरुपमा आयोजना गरेको प्रतियोगिताको फाइनलमा इटालीलाई पराजित गर्दै स्पेन तेस्रोपल्ट च्याम्पियन बनेको थियो ।

त्यसयताका दुई संस्करणमा सेमिफाइनल पार गर्न नसेकको स्पेनले इङ्ल्यान्डलाई २-१ गोलअन्तरले पराजित गर्दै कीर्तिमानी चौथोपल्ट उपाधि जतेको हो । जर्मनीले तीन र इटालीले दुईपल्ट मात्रै युरो कप जित्न सकेको थियो ।