अखबार नेपाल ट्रेन्डिङ

एजेन्सी: यूरोकप २०२४ को पहिलो सेमिफाइनलमा आज राति स्पेन र फ्रान्सबीच प्रतिष्पर्धा हुँदैछ । खेल नेपाली समय अनुसार राति पौने १ बजे जर्मनीमा सुरु हुनेछ ।

स्पेन र फ्रान्स दुवैले अतिरिक्त समयमा आ-आफ्ना प्रतिद्वन्द्वीलाई हराएर सेमिफाइनलमा स्थान बनाएका हुन् । फ्रान्सलाई अन्तिम चारमा पुग्न पोर्चुगलविरुद्ध टाइब्रेकरसम्म खेल्नु परेको थियो । स्पेन आयोजक जर्मनीविरुद्धको क्वाटरफाइनलको ११९औँ मिनेटमा मिकेल मेरिनोको गोलले अघि बढेको हो । सेमिफाइनल पुग्ने क्रममा स्पेनका मिडफिल्डर पेड्री जर्मनीविरुद्धको खेलमा गम्भीर रूपमा घाइते भए । उनले अब बाँकीका खेल खेल्न सक्ने छैनन् । उनको स्थानमा डानी ओल्मोले खेल्नेछन् ।

सन् १९६४, २००८ र २०१२ मा स्पेन तथा सन् १९८४ र २००० मा फ्रान्स युरो च्याम्पियन बनेका थिए। युरोपेली च्याम्पियनसिपको सेमिफाइनलमा स्पेन पुगेको यो छैटौँ पटक हो। जसमध्ये स्पेन अन्तिम चारमा मात्र एक पटक हारेको छ । युरो-२०२० को सेमिफाइनलमा स्पेनले तत्कालीन च्याम्पियन इटालीसँग टाइब्रेकरमा पराजित भएको थियो । फ्रान्सले पनि छैटौँ पटक सेमिफाइनल खेल्दैछ । जसमध्ये फ्रान्स तीन पटक फाइनलमा पुगेको छ । सन् २०१६ को युरो फाइनलमा पोर्चुगलसँग १-० ले हारेको फ्रान्सले सन् २०२२ को विश्वकपमा पनि अर्जेन्टिनासँग टाइब्रेकरमा पराजित भएको थियो । सन् २०१८ मा भएको विश्वकप भने फ्रान्सलाई फाइनलमा क्रोएसियालाई हराउँदै जितेको थियो ।

फ्रान्स र स्पेनबीच अहिलेसम्म ३६ पटक भिडन्त भएको छ । जसमध्ये स्पेनले १६ र फ्रान्सले १३ खेल जितेका छन् । यद्यपि पछिल्ला ८ खेलमा फ्रान्सले पाँचमा जित हात पारेको छ । स्पेन र फ्रान्सबीचको विजेताले दोस्रो सेमिफाइनल खेल्ने इङ्ग्ल्यान्ड र नेदरल्यान्ड्सको विजेतासँग उपाधिका लागि भिड्ने छन् ।