अखबार नेपाल ट्रेन्डिङ

काठमाडौं: आईसिसी टी-२० विश्वकपको सुपर एटको पहिलो खेलमा दक्षिण अफ्रिकाले अमेरिकालाई पराजित गरेको छ । दक्षिण अफ्रिका १८ रनले विजयी भएको हो ।

दक्षिण अफ्रिकाले दिएको १९५ रनको लक्ष्य पछ्याएको अमेरिकाले निर्धारित २० ओभरमा ६ विकेट गुमाउँदै १७६ रन मात्रै बनाउन सक्यो । अमेरिका एन्ड्रियस गौसले अविजित रहँदै सर्वाधिक ८० रन बनाए । ४७ बल खेलेका उनले समान पाँच चौका र छक्का प्रहार गरे । हरमीत सिंह ३८, स्टीवन टेलर २४ र कोरी एन्डर्सन १२ रनमा आउट हुँदा अन्यले दोहोरो अंकमा रन बटुल्न सकेनन् । दक्षिण अफ्रिकाका कगिसो रबाडाले सर्वाधिक तीन विकेट लिए । केशव महाराजा, एनरिख नोर्खिये र तबरेज शम्सीले समान एक विकेट लिए ।

टस हारेर पहिला ब्याटिङ थालेको दक्षिण अफ्रिकाले निर्धारित २० ओभरमा ४ विकेट गुमाउँदै १९४ रन बनाएको थियो । दक्षिण अफ्रिकाका ओपनर क्विन्टन डी ककले सर्वाधिक ७४ रन बनाए । ४० बल खेलेका उनले ७ चौका र ५ छक्का प्रहार गरे । कप्तान एडन मार्क्रम ४६ र रिजा हेड्रिक्स ११ रनमा आउट हुँदा हाइनरिक क्यालसन ३६ र ट्रिस्टन स्टब्स २० रनमा अविजित रहे । अमेरिकाका सौरभ नेत्रवलकर र हरमीत सिंहले समान दुई विकेट लिए ।