अखबार नेपाल ट्रेन्डिङ

पोखरा: पोखरामा जारी आहारारा पोखरा गोल्डकपको २३औं संस्करणको उपाधिका लागि आज विभागीय टोली त्रिभुवन आर्मी र थ्रीस्टार क्लबबीच उपाधिका लागि भिड्दैछन् । यी दुईबीचको खेल दिउँसो २ बजे पोखरा रंगशालामा हुनेछ ।

थ्रीस्टार क्लबले सेमिफाइनलमा जावलाखेल युथ क्लबलाई १-० र विभागीय टोली नेपाल आर्मीले सेमिफाइनलमा चर्च ब्वाइजलाई २-१ गोल अन्तरले पराजित गर्दै उपाधि भिडन्त पक्का गरेको हो । आहारारामा यसअघि अन्तिमपटक दुवै टिम २०७५ सालमा भिडेका थिए । उक्त खेलमा आर्मीलाई ट्राइब्रेकरमा ५-४ ले हराउँदै थ्रीस्टारले उपाधि उचालेको थियो ।

थ्रीस्टार ६ पटक सहभागी हुँदा ५ पटक आहाराराको उपाधि जितिसकेको छ । नेपाल आर्मीको यो १५औं सहभागिता हो । यसअघि ४ पटक फाइनल पुगेर पनि उपविजेतामै सीमित बनेको थियो । आर्मी यसअघि २०६५, २०६६, २०७२ र २०७५ मा फाइनलमा पुगेर उपविजेता बनेको छ । थ्रीस्टार भने यसअघि २०६३, २०६७, २०६९, २०७१, २०७४ र २०७५ मा फाइनलमा पुगेकोमा २०७४ मा बाहेक सबै फाइनलमा विजयी भएको छ ।

यसपटकको उपाधि जिते दुवैलाई आफ्नो इतिहास बनाउने अवसर छ । नेपाल आर्मी आफ्नो हारको श्रृंखला ब्रेक गर्न चाहन्छ भने थ्रीस्टार आहाराराको सर्वाधिक विजेता टोलीमा आफूलाई सामेल बनाउन चाहन्छ ।