अखबार नेपाल ट्रेन्डिङ

काठमाडौं: नेपाल सुपर लिग (एनएसएल) को इलिमिनेटरमा आज साविक विजेता काठमाडौं रेजर्स र ललितपुर सिटी एफसी भिड्दैछन् । खेल त्रिपुरेश्वरस्थित दशरथ रंगशालामा बेलुकी ५:३० बजे हुनेछ ।

प्रतियोगितामा काठमाडौं तेस्रो र ललितपुर चौथो स्थानमा रहँदै प्लेअफमा पुगेका हुन् । तेस्रो स्थानको काठमाडौंले ८ खेलबाट ३ खेलमा जित र ३ खेलमा बराबरीको नतिजा ल्याएको छ । यस्तै, दुई खेलमा हार बेहोरेर  १२ अंक जोड्दै उसले प्लेअफमा स्थान बनाएको हो ।

चौथो स्थानको ललितपुरले लिग चरणमा २ जित, ४ बराबरी र २ खेलमा हार बेहोरेको छ । यसअघि लिग चरणको अन्तिम खेलमा काठमाडौंले ललितपुरलाई १–० ले हराएको थियो । आजको खेलमा जित निकाल्ने टिमले फाइनल प्रवेशका लागि दोस्रो प्लेअफमा पोखरा थण्डर्ससँग खेल्ने छ ।

यसअघि धनगढी एफसी एनएसएलको फाइनलमा प्रवेश गरेको छ । सोमबार दशरथ रंगशालामा पोखरा थन्डर्सलाई पेनाल्टी सुटआउटमा ४–३ गोल अन्तरले हराउँदै धनगढी प्रतियोगिताको फाइनल प्रवेश गरेको हो ।

निर्धारित र अतिरिक्त समयको खेल २–२ गोलको बराबरीमा सकिएपछि निर्णय पेनाल्टी सुटआउटमा भएको थियो । निर्धारित र अतिरिक्त समयको खेलमा दुई पटक खेलमा पुनरागमन गर्न सफल भएको धनगढीले टाइब्रेकरमा समेत उत्कृष्ट कमब्याक गर्न सक्यो ।

खेलको अन्तिम मिनेटमा गोल गर्दै धनगढीलाई टाइब्रेकरमा पुर्याएका अहमद हिजाजी पेनाल्टी सुटआउटमा चुकेका थिए । तर गोलकिपर मोहमद टाहाले उत्कृष्ट खेल प्रर्दशन गर्दै साविक उपविजेता धनगढीलाई फाइनल यात्रा तय गराए । उनले पेनाल्टी सुटआउटमा पोखराका दुई उत्कृष्ट फरवार्डको प्रहारलाई रोक्न सफल भए ।