अखबार नेपाल ट्रेन्डिङ

काठमाडौं: नेपाल सुपर लिग (एनएसएल) फुटबल प्रतियोगितामा आज ललितपुर सिटी फुटबल क्लब र वीरगञ्ज युनाइटेडबीच प्रतिस्पर्धा हुने भएको छ । खेल त्रिपुरेश्वरस्थित दशरथ रंगशालामा साँझ ५ बजे सुरु हुनेछ ।

लाखे टिम ललितपुरलाई लिग तालिकाको शीर्ष स्थानमा उक्लिने अवसर छ । ललितपुर ५ अक सहित दोस्रो स्थानमा छ । बिरगञ्जलाई हराएको खण्डमा ललितपुरले शीर्ष स्थानको धनगढीलाई दोस्रो स्थानमा झार्न सक्छ, आफु शीर्ष स्थानमा उक्लिन सक्छ । तुलनात्मक रुपमा बिरगञ्ज एनएसएलमा कमजोर देखिएको छ । सुरुवाती दुई खेलमा हार ब्यहोरेको बिरगञ्ज अंक विहीन हुँदै तालिकाको पुछारमा छ ।

ललितपुरले अघिल्लो खेलमा लगातार दुई खेलमा जित निकालेको धनगढीलाई रोक्न सफल भएको थियो । ललितपुरले भने पछिल्लो तीन खेलमा १ मा जित र २ खेलमा बराबरीको नतिजा निकालेको छ । ललितपुरको ५ अंक र शीर्ष स्थानको धनगढीको ७ अंक छ ।

नवप्रवेशी बिरगञ्जले एनएसएलमा लय भेट्टाउन सकेको छैन । सर्वाधिक रकम खर्च गरेर अक्सनबाट एनएसएलमा छिरेको बिरगञ्जसँग घरेलु फुटबलका परिचित अनुहार छन्, तर नतिजा देखिएको छैन । घरेलु फुटबलमा प्राप्त अनुभव बिरगञ्जको एनएसएलमा लागु हुन सकेको छैन । प्रतियोगिताको आफ्नो तेस्रो खेलमा बिरगञ्जले हारको श्रृङ्खलालाई ब्रेक गर्न कोशिश गर्नेछ । त्यसका लागि चमत्कारी प्रर्दशन र नतिजा बिरगञ्जको टिमलाई चाहिएको छ ।