अखबार नेपाल ट्रेन्डिङ

एजेन्सी: आईसीसी विश्वकप क्रिकेटमा नेदरल्यान्ड्सविरुद्ध भारतले १६० रनको फराकिलो जित निकालेको छ । बैंगलोरको एम चिन्नस्वामी रंगशालामा टस जितेर पहिले ब्याटिङ गरेको भारतले निर्धारित ५० ओभरमा ४ विकेट गुमाएर नेदरल्यान्ड्स सामु ४१० रनको लक्ष्य दिएको थियो ।

जवाफी ब्याटिङमा उत्रिएको नेदरल्यान्ड्सले ४७ दशमलव ५ ओभरमा २५० रन बनाउँदा सबै विकेट गुमायो । नेदरल्यान्ड्सका तेजा निदामानुरु अर्धशत प्रहार गरे । उनले ३९ बलमा ५४ रन जोडे । साइब्रान्ड एन्जलब्रेच्टले ४५ रन जोडे ।

बलिङतर्फ भारतका जसप्रित बुम्रहा, मोहम्मेद सिराज, कुलदीप यादव र रविन्द्र जडेजाले समान दुई-दुई विकेट लिए भने विराट कोहली र रोहित शर्माले समान एक-एक विकेट लिए । त्यसअघि पहिलो विकेटका लागि कप्तान रोहित शर्मा र सुभमन गीलले ७१ बलमा १ सय रनको साझेदारी गर्दै भारतलाई उत्कृष्ट सुरुवात दिलाएका थिए । रोहित ६१ रन र गिल ५१ रनमा आउट भए ।

विराट कोहली ५१ रन बनाएर आउट भए । चौंथौ विकेटका लागि श्रेयस आय्यर र के एल राहुलले १२८ बलमा २०८ रनको साझेदारी गरे । ६२ बलमा शतक पूरा गरेका राहुल भारतका लागि विश्वकपमा सर्वाधिक छिटो शतक बनाउने ब्याटर बने । उनी १०२ रनमा आउट भए । श्रेयस १२८ रनमा नट आउट रहे । विश्वकपमा उनको पहिलो शतक हो । विश्वकप क्रिकेटमा टप अर्डरका पाँच ब्याट्सम्यानले ५० रन माथि बनाएको यो पहिलो पटक हो ।

नेदरल्यान्ड्सका बास डे लीडेले २ तथा पोल भ्यान मिकरेन, मर्वेले १-१ विकेट लिए । समूह चरणमा लगातार ९ खेलमा जित निकालेको भारत अपराजित रहँदै सेमिफाइनलमा पुग्यो ।