अखबार नेपाल ट्रेन्डिङ

काठमाडौं: अर्जुन कुमालको कीर्तिमानी शतक र दीपेश कडेलको घातक बलिङमा साउदी अरेबियाविरुद्ध विशाल जित हासिल गर्दै नेपाल एसीसी यू-१९ प्रिमियर कपको सेमिफाइनलमा प्रवेश गरेको छ ।

बिहीबार भएको खेलमा नेपालले साउदीलाई ३०१ रनको विशाल अन्तरले हराउँदै अन्तिम चारमा पुगेको हो । समूह एमा रहेको नेपाल अपराजित रहँदै समूह विजेताका रूपमा अन्तिम चारमा पुगेको हो । नेपालले ३ खेलबाट ६ अंक बनाउँदै समूहको शीर्ष स्थानमा रहँदै सेमिफाइनल यात्रा तय गरेको हो ।

नेपालसँगको हारसँगै साउदी दोस्रो स्थानमा रहेर बाहिरिएको छ । बहराइन तेस्रो र इरान चौथो स्थानमा रहँदै उनीहरुले प्रिमियर कपको यात्रा सकाएका छन् । नेपालले दिएको ३४८ रनको विशाल लक्ष्य पछ्याएको साउदी १९.१ ओभरमा मात्र ४६ रनमा अलआउट भयो ।

नेपालका दीपेश कँडेल एक्लैले ६ विकेट लिए । घातक बलिङ गरेका उनले ९.१ ओभरमा मात्र १८ रन खर्चे । आकाश चन्दले २ तथा सुवास भण्डारीले एक विकेट आफ्नो नाममा गरे । नेपालका बलरसामु साउदीका ब्याटरहरु लामो समय क्रिजमा टिक्न सकेनन् । नेपालविरुद्ध साउदीका वरुण सराभननले बनाएको ११ रन नै साउदीका लागि सर्वाधिक रह्यो । अब्दुल सिराजले ९ रन थपे । अन्य ब्याटरले दोहोरो अंकको स्कोर छुन सकेनन् ।

त्यसअघि साउदीले टस जितेर फिल्डिङ रोजेपछि ब्याटिङ गरेको नेपाली टोलीले निर्धारित ५० ओभरमा ७ विकेटको क्षतिमा ३४७ रनको विशाल योगफल तयार पारेको हो । साउदीविरुद्ध ओपनर अर्जुन कुमालले १४२ रनको शतकिइ पारी खेले । १११ बलको सामना गरेका अुर्जनले १७ चौका र २ छक्का हाने ।  यू-१९ टोलीबाट दुई शतक हान्ने अजुर्न दोस्रो खेलाडी हुन्। यसअघि कप्तान देव खनालले दुई शतक हानेका थिए ।

दोस्रो विकेटका लागि अर्जुन र आकाशले १६२ बलमा १८९ रनको आक्रमक साझेदारी गरे । अर्जुन ३९औं ओभरको तेस्रो बलमा मोहम्मद अहमद राजाको बलमा मुहम्मद गायोर अहमदको हातबाट क्याच आउट भए । आकाश ९ रन बनाउँदा क्याच आउट भए । ९ बलको सामना गरेका आकाशले ६ चौका र २ छक्का प्रहार गरे ।

त्यसअघि ओपनर दीपक बोहोरा २९ रनमा क्याच आउट भएका थिए । पहिलो विकेटका लागि अर्जुन र दीपकले ११.५ ओभरमा ७१ रनको साझेदारी गर्दै नेपाललाई उत्कृष्ट सुरुआत दिलाएका थिए । दीपकप्रसाद डुम्रे १४ रन बनाउँदा एलबीडब्लु धरापमा परे । दीपेश कँडेल १४ रनमा क्याच आउट भए । मिलन बोहोरा ९ रनमा एलबीडब्लु धरापमा नै पर्दै पवेलियन फर्के ।

कुवेतका मुहम्मद राजा र मुहम्मद गायोर हमदलले समान २ विकेट लिए । जुहैर मुहम्मद र शाजिद शहमाले एक–एक विकेट आफ्नो नाममा गरे । प्रिमियर कपको समूह चरणमा ३ सयभन्दा बढी रन कटाउने नेपाल पहिलो टोली हो । प्रिमियर कपको पहिलो खेलमा नेपालले इरानसामु ३५३ रनको योगफल तयार पारेको थियो ।

समूह चरणको पहिलो खेलमा इरानलाई २७४ रनले हराएको नेपालले दोस्रो खेलमा इरानलाई ७ विकेटले हराएको थियो । प्रिमियर कपमा चार समूहका शीर्ष स्थानमा रहने टोलीले सेमिफाइनलमा स्थान बनाउनेछन् । फाइनलमा पुग्ने २ टोली र तेस्रो स्थानमा रहने टोली गरी तीन टोलीले एसिया कपमा स्थान बनाउनेछन् ।

सेमिफाइनल खेल कार्तिक ५ गते हुनेछ । पहिलो सेमिफाइनलमा समूह ए र डी का शीर्ष स्थानमा रहने टोलीबीच स्पर्धा हुनेछ । दोस्रो सेमिफाइनलमा समूह बी र सी का शीर्ष स्थानमा रहने टोली भिड्नेछन् । फाइनल र तेस्रो स्थानको खेल कार्तिक ७ गते हुनेछ ।