अखबार नेपाल ट्रेन्डिङ

काठमाडौं: कप्तान देव खनालको कीर्तिमानी शतकमा नेपाली युवा टोलीले एसिसी यू–१९ प्रिमियर कपमा सानदार सुरुवात गरेको छ । इरानलाई २७४ को फराकिलो रनले पराजित गर्दै विजय सुरुवात गरेको हो ।

नेपालले दिएको ३५४ रनको विशाल लक्ष्य पछ्याएको इरान ३०.५ ओभरमा मात्र ७९ रन बनाएर अल आउट भयो । इरानलाई कम स्कोरमा रोक्न नेपालका दिपेश कँडेल र सुवास भण्डारीले समान ३ विकेट लिए ।

घातक बलिङ गरेका सुवास भण्डारीले ८.५ ओभरमा ४ मेडन राख्दै ६ रन खर्चेर ३ विकेट लिए । दिपेश कँडेलले ७ ओभरमा ३ मेडन राख्दै ४ रन दिएर ३ विकेट लिए । आकाश चन्दले र हेमन्त धामीले समान २ विकेट लिए । विकेट किपर अमेर खोर्सान्दले बनाएको ३७ रन नै इरानका लागि सर्वाधिक रह्यो । सावेर इब्राहिमिपोउर ११ रनमा नटआउट रहे । अन्य ब्याटरले दोहोरो अंकको स्कोर छुन सकेनन् ।

त्यसअघि इरानले टस जितेर फिल्डिङ गरेपछि ब्याटिङ गरेको नेपाल ४०.१ ओभरमा ३५३ रन बनाएर अल आउट भयो । इरानविरुद्ध कप्तान देव खनालले कीर्तिमानी शतक प्रहार गरे । देवले ६० बलमा १२ चौका र ४ छक्का प्रहार गरे ।

तेस्रो विकेटका लागि कप्तान देव खनाल र दिपक बोहोराले १६६ रनको शतकिय साझेदारी गरेपछि नेपाल विशाल योगफल बनाउन सहयोग गरे । बोहोरा र खनालले ९८ बलमा १६६ साझेदारी गरे । दीपक ५९ बलमा ५ चौका र २ छक्कासहित ६५ रनमा आउट भए ।

विकेटकिपर दीपक प्रसाद डुम्रे ६९ रनमा आउट भए । दीपेश कंडेल २९, आकाश चन्द १९,  हेमन्त धामी २३, सुवास भण्डारीले १८ रन थपे । आकाश त्रिपाठी ३ रनमा आउट हुँदा ओपनर अर्जुन कुमाल र मिलन बोहोरा गोल्डेन डक आउट भए ।

इरानका लागि दद्रहमान राइसी र लमान निज्मान्दले समान ३ विकेट लिए । समान शेखी र जियाद राइसीले समान दुई विकेट लिए । समूह चरणको दोस्रो खेलमा नेपालले आइतबार बहराइनविरुद्ध खेल्नेछ ।