अखबार नेपाल ट्रेन्डिङ

काठमाडौं: चीनमा जारी १९औं एसियाली खेलकुद (एसियाड) अन्तर्गत क्रिकेटमा आज नेपालले माल्दिभ्सविरुद्ध खेल्दै छ । नेपालले टस जितेर पहिला ब्याटिङ गर्ने निर्णय गरेको छ ।

नेपालले पहिलो खेलमा मंगोलियालाई २७३ रनले हराएको थियो । मंगोलियाविरुद्ध ११ विश्व कीर्तिमान बनाएको नेपालले माल्दिभ्सविरुद्ध पनि त्यस्तै नतिजा निकाल्न चाहन्छ । माल्दिभ्सले दोस्रो रोजाईको टोली एसियाड खेल्न पठाएको छ । पहिलो रोजाईको टोली कतारमा आइसिसी टि-२० विश्वकप एसिया रिजनल छनोट ‘ए’ खेलेको छ ।

माल्दिभ्सले पहिलो खेलमा मंगोलियालाई ९ विकेटले हराएको थियो । यस खेलको विजेता टोली क्वाटरफाइनलमा स्थान बनाउनेछ । नेपालको लक्ष्य माल्दिभ्सविरुद्ध पनि रनको वर्षा नै हुनेछ । विश्व वरियतामा टि-२० आईमा माल्दिभ्स ७८औं र नेपाल १६औं स्थानमा छ । त्यसमा पनि माल्दिभ्सको दोस्रो रोजाईको टोली छ ।

नेपालका तीव्र गतिका बलर करण केसीलाई आजको खेलमा विश्राम दिएको छ । करणले विश्राम पाउँदा विकेटकिपर विनोद भण्डारीलाई टोलीमा मौका दिएको छ । नेपालले मंगोलियाबाट टोलीमा अन्य परिवर्तन गरेको छैन । नेपालको बेन्चमा प्रतिश जि.सी, सागर ढकाल, विवेक यादव र करण केसी छन् ।

नेपालको प्लेइङ-११

कुशल भुर्तेल, आसिफ शेख, विनोद भण्डारी, रोहित पौडेल (कप्तान), सन्दीप जोरा, कुशल मल्ल, दीपेन्द्रसिंह ऐरी, सोमपाल कामी, गुलशन झा, सन्दीप लामिछाने र अभिनाश बोहरा ।