अखबार नेपाल ट्रेन्डिङ

काठमाडौं: भारतमा हुने १४औं संस्करणको साफ पुरुष च्याम्पियनसिपको तयारीका लागि फिलिपिन्स पुगेको नेपाली राष्ट्रिय फुटबल टोलीले आज घरेलु टोली फिलिपिन्ससँग मैत्रीपूर्ण खेल खेल्दै छ ।

रिजाल मेमोरियल स्टेडियममा हुने नेपाल र फिलिपिन्सबिचको मैत्रीपूर्ण खेल नेपाली समयानुसार अपरान्ह ४:४५ बजे शुरु हुनेछ । फिलिपिन्स बसाईंको क्रममा नेपालले घरेलु टोलीसँग एक मैत्रीपूर्ण खेल खेल्न लागेको हो ।

फिलिपिन्ससँगको मैत्रीपूर्ण खेल तथा साफ च्याम्पियनसिपका लागि नेपाली टोलीका मुख्य प्रशिक्षक भिन्सेन्जो अल्बर्टो एनेसेले २३ सदस्यीय नेपाली टोली घोषणा गरेका थिए ।

प्रशिक्षक भिन्सेन्जोले घोषणा गरे अनुसार डिफेन्डर विमल पाण्डे, सिमान्त थापा र मिडफिल्डर लाकेन लिम्बुले तीन जनाले पहिलो पटक राष्ट्रिय टोलीमा स्थान बनाएका छन् । सम्भवतः फिलिपिन्ससँगको मैत्रीपूर्ण खेलमा प्रशिक्षक भिन्सेन्जोले यी तीन खेलाडीलाई राष्ट्रिय टोलीमा डेब्युको अवसर दिनेछन् ।

भारतमा आयोजना हुने च्याम्पियनसिपको समूह ‘ए’ मा परेको नेपालले उद्घाटन खेलमा कुवेतसँग प्रतिष्पर्धा गर्नेछ । प्रतियोगितामा सहभागी हुने आठ राष्ट्रलाई दुई समूहमा विभाजन गरिएको छ ।

समूह ‘ए’ मा नेपालसँगै आयोजक भारत, कुवेत र पाकिस्तान रहेका छन् । समूह ‘बी’ मा लेबनान, माल्दिभ्स, भुटान र बंगलादेश रहेका छन् ।

नेपाल र कुवेतबिचको उद्घाटन खेल ब्याङ्गलोरमा असार ६ गते हुनेछ । यो खेल नेपाली समयानुसार दिउँसो ३:४५ बाट शुरु हुनेछ ।

यस्तै नेपालले दोश्रो खेल असार ९ गते आयोजक भारत र समूह चरणको तेश्रो तथा अन्तिम खेलमा असार १२ गते पाकिस्तानविरुद्ध खेल्नेछ ।

भारतको ब्याङ्गलोरमा असार ६ देखि १८ गतेसम्म आयोजना हुने साफ च्याम्पियनसिपमा नेपालसँगै, भारत, कुवेत, पाकिस्तान, बंगलादेश, भुटान, माल्दिभ्स र बंगलादेशले भाग लिदैछन् ।