अखबार नेपाल ट्रेन्डिङ

काठमाडौं: नेपालले प्रधानमन्त्री थ्री नेसन्स कपको उपाधि जितेको छ । त्रिपुरेश्वरस्थित दशरथ रंगशालामा भएको फाइनलमा लाओसलाई २–१ गोलले हराउँदै नेपालले उपाधि जितेको हो ।

शुक्रबार दशरथ रंगशालामा सम्पन्न फाइनलमा नेपालले पहिलो हाफमै गोल खाएपनि उत्कृष्ट पुनरागमन गर्दै २-१ को जित दर्ता गरेको हो ।

लाओसले सुरुवाती अग्रता लिएको केहि मिनेटमै नेपालका आयुष घलानले बराबरी गोल फर्काए । मनिष डाँगीले अन्त्यतिर गोल गर्दै नेपाललाई उपाधि दिलाए ।

खेलको १७ औं मिनेटमा फोथाभोंग सांग्भिलेले गोलबाट लाओसले अग्रता लिएको थियो । खेलको २४औं मिनेटमा एरिक विष्टले दिएको पासलाई आयुष घलानले पेनाल्टी क्षेत्रभित्र सुन्दर फिनिस गरेपछि नेपालले बराबरी गोल फर्कायो ।

दोस्रो हाफको ५५औं मिनेटमा नेपाल अग्रता लिनबाट चुक्यो । मनिष डाँगीले दायाँ विंगबाट दिएको क्रसलाई दिपक र आयुषले ६ यार्ड बक्स भित्रबाट गोलको दिशा दिन सकेनन् ।

खेलको ६१ औं मिनेटमा आयुषले अग्रता दोब्बर पार्ने सुवर्ण अवसर गुमाए । नविनको क्रसमा गोलरक्षक फ्रन्ट पोस्टमा बिट भएपछि आयुषले खाली पोस्टमा हेडरलाई पोस्टको दिशा दिन सकेनन् ।

खेलको ८७औं मिनेटमा अन्जन विष्टले दिएको पासलाई मनिषले पेनाल्टी क्षेत्रभित्र नियन्त्रणमा लिँदै गोल गर्दै नेपाललाई जित दिलाए ।

प्रधानमन्त्री थ्री नेसन्स कपको फाइनलमा विंगर आयुष घलान प्रधानमन्त्री थ्री नेसन्स कपको सर्वोत्कृष्ट खेलाडी घोषित भए । अवार्डसँगै उनले ५ सय अमेरिकी डलर प्राप्त गरे । आयुष भुटानविरुद्ध लिग चरणको दोस्रो खेलमा प्लेयर अफ द म्याच चुनिएका थिए ।

त्यसैगरी विंगर मनिष डाँगी प्लेयर अफ द म्याच चुनिए । प्रतियोगिताको फाइनलमा विजयी गोल गरेका मनिष प्लेयर अफ द म्याच बन्दै २५० डलर प्राप्त गरे ।

विजेतालाई राष्ट्रिय खेलकुद परिषद् (राखेप) का संरक्षक तथा प्रधानमन्त्री पुष्पकमल दाहाल (प्रचण्ड) , राष्ट्रिय खेलकुद परिषद्का सदस्य-सचिव टंकलाल घिसिङ, एन्फा अध्यक्ष पंकज विक्रम नेम्वाङ, वरिष्ठ उपाध्यक्ष वीरबहादुर खड्का र महासचिव किरण राई लगायतले पुरस्कृत गरे ।