अखबार नेपाल ट्रेन्डिङ

काठमाडौं: बुढासुब्बा टुबोर्ग गोल्डकपको २३औं संस्करण आजबाट सुरु हुदैछ । प्रतियोगिताको सम्पूर्ण तयारी बारे धरान फुटबल क्लबले पत्रकार सम्मेलन गर्दै जानकारी दिएको हो ।

प्रतियोगितामा काउवार्न बजार प्रगति संघ (केबिपिएस) बंगलादेश, एभेनियर एफसी क्यामरुन, नेपाल पुलिस क्लब काठमाण्डौं, बागमती युवा क्लब सर्लाही, काँकडभिट्टा फुटबल ट्रेनिङ सेन्टर (केएफटिसी) झापा, एन्फा मोरङ र आयोजक धरान फुटबल क्लब गरी ८ वटा टिमको सहभागिता रहने छ ।

प्रतियोगिता हेर्न एप अनलाइन टिकट काट्न सकिने र खेलहरुको सबै जानकारी उपलब्ध हुने व्यवस्था गरिएको छ भने खेल हेर्न आउने ६५ बर्ष उमेर माथिकालाई नागरिकता देखाए निःशुल्क प्रवेश गर्न दिने र अपाङ्गता भएका बालबालिकालाई पनि निशुल्क प्रवेश गर्न दिइने क्लबले जनाएको छ ।

उद्घाटन खेलमा आयोजक र युके एफसी भारतबीच प्रतिस्पर्धा हुनेछ ।

प्रतियोगिताको लागि विभिन्न निकाय, संघसंस्था तथा दाताहरुबाट समेत गरेर १ करोड ९ लाख ५० हजार आय हुने अनुमान क्लबको रहेको छ । त्यसमध्ये ८५ लाख ५ हजार खर्च हुने र क्लबलाई मुनाफामा लैजाने लक्ष्य राखेको अध्यक्ष किशोर राईले जानकारी दिए ।

फागुन २० गते सम्म चल्ने प्रतियोगिताको विजेता टोलीले ट्रफीसहित नगद १० लाख पाउनेछ भने उपविजेताले नगद ५ लाख पाउनेछ । उत्कृष्ट खेलाडीलाई नगद १ लाख दिइने जनाइएको छ ।

प्रत्येक खेलको म्यान अफ दि म्याचलाई १० हजार दिइनेछ भने उत्कृष्ट गोलरक्षक, डिफेन्स, मिडफिल्डर, स्ट्राइकर, प्रशिक्षकलाई जनही २५ हजार पुरस्कार दिइनेछ ।

प्रतियोगिताको सर्वाधिक गोलकर्तालाई ३५ हजार पुरस्कार दिइनेछ । उद्घाटन समारोहको प्रमुख अतिथि धरानका नगर प्रमुख हर्क साम्पाङ राई रहने छन् ।