अखबार नेपाल ट्रेन्डिङ

काठमाडौं: नेपालले घरेलु मैदानमा आजदेखि नामिबिया, स्कटल्याण्ड र नेपाल सम्मिलित त्रिकोणत्मक सिरिज खेल्दै छ ।

सिरिजको पहिलो खेल आज नेपाल र नामिबियाबीच हुँदै छ । आजदेखि हुने यो त्रिकोणीय सिरिज फागुन ९ गतेसम्म सञ्चालन हुनेछ ।

यस सिरिजमा तिनै टिमले एक अर्काविरुद्ध दुई/दुई खेल खेल्ने छन् । नेपालले नामिबियाविरुद्ध आज खेल्ने छ भने स्कटल्याण्डविरुद्ध फागुन ५ गते र फागुन ९ गते खेल्ने छ ।

आईसीसी क्रिकेट विश्वकप लिग टु अन्तर्गत नेपाल अहिले २४ खेल खेल्दै १८ अंकसहित छैटौं स्थानमा रहेको छ ।

यस सिरिजमा सहभागी स्कटल्याण्ड ३२ खेलमा २२ मा जित र ८ मा हारका साथ ४६ अंक जोडेर अंक तालिकाको शीर्ष स्थानमा रहेको छ ।

लिग टूको विजेता बन्न औपचारिकता बाँकी रहेको स्कटल्याण्डले यस वर्ष नै आयोजना हुने एकदिवसीय विश्वकपको ग्लोबल छनोटमा स्थान बनाईसकेको छ ।

नामिबिया विश्वकप लिग टूको शीर्ष तीनमा पर्न सम्भावना भएको अर्को टोली हो । नामिबिया नेपाल भ्रमणका क्रममा शीर्ष तीनको स्थान बलियो बनाउँन चाहान्छ ।

हालसम्म नामिबिया ३० खेलमा १८ मा जित र ११ मा हारसहित ३७ अंक जोड्दै तेस्रो स्थानमा छ । शीर्ष तीनमा रहि सिधै विश्वकप छनोट खेल्न नेपालले खेल्न बाँकी सबै १२ खेल जित्नुपर्ने हुन्छ ।