अखबार नेपाल ट्रेन्डिङ

काठमाडौं: सन् २०२२ मा कतारमा हुने विश्वकप फुटबलका लागि एसियाको दोस्रो चरणको छनोटमा नेपाल समूह ‘बी’ मा परेको छ । विश्व फुटबलको सर्वोच्च निकाय फिफाले हिजो सार्वजनिक गरेको ड्र अनुसार नेपाल समूह ‘बी’ मा परेको हो ।

नेपालको समूहमा एसियाली पावर हाउस अष्ट्रेलिया, जोर्डन, कुवेत र चाईनिज ताइपेइ रहेका छन । सेप्टेम्बरदेखि जुनसम्म हुने दोस्रो चरणको छनोटमा ४० टोलीले होम एण्ड अवेको आधारमा प्रतिस्पर्धा गर्नेछन् । जसलाई ८ समूहमा विभाजन गरिएको छ ।

दोस्रो चरणको छनोटबाट ८ समूह विजेता र ४ उपविजेता गरी १२ टोलीले एसियाको अन्तिम छनोटमा स्थान बनाउने छन् । फिफाले गत अप्रिलमा सार्वजनिक गरेको वरियतामा एसियाली राष्ट्रको शीर्ष ३४ भित्र परेपछि नेपालले सिधै दोस्रो चरणको छनोट खेल्न पाएको हो । १६१ औं स्थानमा रहेको नेपाल एएफसी वरियताको ३४औं स्थानमा रहेको थियो ।

सन् १९८६ को संस्करणबाट विश्वकप छनोट खेल्न थालेको नेपालले पहिलो पटक सिधै दोस्रो चरण खेल्न पाएको हो । नेपालले सन् २०१४ को संस्करणमा पहिलो चरण पार गर्दै दोस्रो चरणको छनोट खेलेको थियो ।