अखबार नेपाल ट्रेन्डिङ

एजेन्सी: कोपा अमेरिका अन्तर्गत समूह ‘सी’ को अन्तिम खेलमा उरुग्वेले चिलीलाई पराजित गरेको छ । उरुग्वेको जितमा एडिन्सन काभानीले खेलको अन्तिम समयमा गरेको गोल निर्णायक सावित भयो ।

काभानीले खेलको ८२औं मिनेटमा विजयी गोल गरेका थिए । खेलको ७०औं मिनेटमा चिलीले अग्रता लिने अवसर गुमाएको थियो । ७०औं मिनेटमा चिलीका डिआजले फ्लिक गरेको बलमा गोलरक्षक फर्नान्डो मुस्लेरा बिट भएपनि डिफेन्डर जोसे जिमिनेजले गोललाइनबाट बचाएका थिए ।

पहिलो हाफमा दुवै टोलीले रक्षात्मक खेल्दै काउन्टर अट्याकमा गोलको प्रयास गरेका थिए । पहिलो हाफको २ मिनेट समय बाँकी रहँदा उरुग्वेले गोल गर्ने मौका पाएको थियो । खेलको २३ औं मिनेटमा सुआरेजले गोलरक्षकलाई बिट गरेपनि प्रहार गर्न ढिलो गर्दा गोलरक्षक आरिआसले बचाऊ गरेका थिए ।

समूहको अर्को खेलमा जापान र इक्वेडर १-१ को बराबरीमा रोकिएपछि जापान समूह चरणबाट बाहिरिएको छ । जापानले शोया नाकाजिमाको गोलमा १५ औं मिनेटमा अग्रता लिएपनि इक्वेडर ३५ औं मिनेटमा गोल फर्कायो । इक्वेडरका लागि एन्जल मेनाले गोल गरेका थिए ।

समूह सी बाट उरुग्वे ३ खेलमा ७ अंकसहित शीर्षस्थानमा रहयो भने चिली ६ अंक सँगै उपविजेताको रुपमा क्वार्टरफाईनलमा प्रवेश गरेको छ । जापान २ अंक र इक्वेडर १ अंकसहित प्रतियोगिताबाट बाहिरिएका छन् ।