अखबार नेपाल ट्रेन्डिङ

एजेन्सी: कोपा अमेरिकामा आमन्त्रित टोलीको रुपमा सहभागिता जनाएको जापान पहिलो खेलमा साविक विजेता चिलीसँग पराजित भएको छ । निकै प्रतिस्पर्धात्मक खेलको ४१औं मिनेटमा एरिक पुल्गरको गोलमा चिलीले अग्रता लिएको थियो ।

दोस्रो हाफको ५४औं मिनेटमा भार्गासले गोल गर्दै चिलीको अग्रता दोब्बर पारे । ८२औं मिनेटमा एलेक्सिस सान्चेजले गोल गर्दै जित पक्का गरे । त्यसको एक मिनेट नबित्दै भार्गासले व्यक्तिगत दोस्रो गोल गरे । कोपा अमेरिकाको पछिल्लो दुवै संस्करणमा चिली च्याम्पियन हुँदा भार्गास सर्वाधिक गोलकर्ता बनेका थिए । उनले यस संस्करणमा पनि सुखद सुरुवात गरेका छन् ।

यता जापानले रियल म्याड्रिडले यसै साता भित्र्याएका ताकेफुसा कुबोलाई ९० मिनेट मैदानमा उतारेपनि गोल गर्न सकेन । दुवै टोलीले उत्तिकै अवसर पाएपनि जापानले आक्रमणमा भने फितलो प्रदर्शन गरेको थियो । जापानले अब शुक्रबार बिहान हुने दोस्रो खेलमा उरुग्वेको सामना गर्नेछ ।