अखबार नेपाल ट्रेन्डिङ

काठमाडौं: आईसीसी क्रिकेट विश्वकप लिग टु अन्तर्गतको त्रिकोणात्मक एकदिवसीय सिरिजमा युएईसँग नेपाल दोस्रो पटक पनि ९९ रनले पराजित भएको छ ।

युएईले दिएको २०३ रनको लक्ष्य पछ्याएको नेपाल ३५ ओभर १ बलमा अलआउट हुँदै १०३ रनमा समेटियो ।

नेपालले एकदिवसीय अन्तराष्ट्रिय क्रिकेटमा बनाएको यो सर्वाधिक कम स्कोर हो ।

खराब सुरुआत गरेको नेपालका आसिफ शेखको स्थानमा आएका ओपनर पवन सर्राफ खेलमा जम्न सकेनन् । उनी मात्र २ रन बनाएर पेभिलियन फर्किए ।

यस्तै अर्का ओपनर कुशल भुर्तेल लगातार तेस्रो खेलमा खराब प्रदर्शनलाई निरन्तरता दिंदै ५ रनमा आउट भए ।

दिपेन्द्र सिंह ऐरी गोल्डेन डक आउट हुँदा नेपालले ३ ओभर नसकिंदै ८ रनमा महत्वपूर्ण ३ विकेट गुमाउन पुगेको थियो ।

नेपालका लागि ज्ञानेन्द्र मल्लले सर्वाधिक रन बनाए । उनले ६५ बल खेल्दै २ चौकाको मद्दतमा ३० रन बनाए ।

आरिफ शेखले ४० बलमा १५ र जोड्दा विनोद भण्डारी दुर्भाग्यवस १२ रनमा आउट भए । सोमपाल कामीसँग दोस्रो रनको लागि तालमेल नमिल्दा बिनोद सहज रनआउट भए ।

करन केसी ४ रनमा आउट हुँदा बिक्रम सोबले १ रन बनाए । सन्दीप लामिछाने बलनै नखेली अविजित रहे ।

यूएईका जुनाइद सिद्दिकीले ४ विकेट लिए । यस्तै कासिफ दौद र अहमेद राजाले समान २/२ विकेट लिए ।

टस हारेर पहिले ब्याटिङ गरेको युएईले निर्धारित ५० ओभरमा ९ विकेट गुमाउदै २ सय २ रन जोडेको थियो ।

युएईका लागि रोहन मुस्तफाले सर्वाधिक ६० रन बनाए । ओपनर मुहम्मद रिजवानले ३३ रन, चिराग सुरीले २६ रनको योगदान गरे ।

भृत्या अरविन्दले २४ रन बनाउँदा बसिल हमिद १७ रनमा आउट भए । करण केसी र सोमपाल कामीले समान २/२ विकेट हात पारे । आरिफ शेख र दिपेन्द्र सिंह ऐरीले १/१ विकेट लिए ।

अब नेपालले मंगलबार पीएनजीविरुद्ध प्रतिस्पर्धा गर्नेछ । लिग टु मा नेपालले ११ खेलमा १० अंक जोडेको छ । नेपाल छैटौं स्थानमा रहेको छ ।

यूएई भने १८ खेलमा २२ अंकका साथ दोस्रो स्थानमा छ ।