अखबार नेपाल ट्रेन्डिङ

काठमाडौं: एपीएफ क्लब प्रधानमन्त्री कप (पीएम कप) टी-ट्वान्टी राष्ट्रिय क्रिकेट प्रतियोगिताको फाइनलमा प्रवेश गरेको छ ।

दोस्रो सेमिफाइनल अन्तर्गत टियु क्रिकेट मैदानमा अर्का विभागीय क्लब त्रिभुवन आर्मीलाई ४७ रनले पराजित गर्दै एपीएफ फाइनलमा प्रवेश गरेको हो ।

एपीएफले दिएको २ सय ३१ रनको विशाल लक्ष्य पछ्याउने क्रममा आर्मी १ सय ८३ रनमै सिमित भयो । आर्मीले ९ विकेट गुमायो ।

आर्मीका लागि राजेश पुलामीले २१ बलमा सर्वाधिक ३८ रन जोडे ।

उनले एक चौका र ४ छक्का प्रहार गरेका थिए ।

भिम सार्कीले १९ बलमा ३५ रन जोडे ।

एपीएफका लागि शरद भेषावकरले सर्वाधिक तीन विकेट हात पारे ।

अविनाश बोहरा र भुवन कार्कीले दुई/दुई विकेट लिए ।

किशोर महतो र दिपक बोहराले एक/एक विकेट हात पारे ।

टस हारेर पहिले ब्याटिङ गर्ने निम्तो पाएको एपीएफले निर्धारित २० ओभरमा २ विकेट गुमाउदै २ सय ३० रन जोड्यो ।

एपीएफका लागि आसिफ शेखले सर्वाधिक ८४ रनको योगदान गरे ।

आसिफले ४३ बल खेल्दै १० चौका र ५ छक्का प्रहार गरे ।

आर्मीका जितेन्द्र मुखिया र सुमित श्रेष्ठले एक/एक विकेट हात पारे ।

यसअघि पहिलो सेमिफाइनलमा बागमती प्रदेशलाई ५० रनले पराजित गर्दै पुलिस फाइनलमा प्रवेश गरेको छ ।

जितका लागि १ सय ५६ रनको लक्ष्य पछ्याएको बागमतीले निर्धारित ओभरमा ८ विकेट गुमाउदै १ सय ५ रनमा सिमित भएपछि पुलिसको जित सुनिश्चित भएको हो ।

बागमतीका लागि आदिल खानले सर्वाधिक २७ रनको योगदान गरे ।

कप्तान ज्ञानेन्द्र मल्लले १६ बलमा २३ रन जोड्दा चार चौका प्रहार गरे ।

पुलिसका दिपेन्द्र सिंह ऐरीले सर्वाधिक ५ विकेट लिए ।

यसअघि टस जितेर पहिले ब्याटिङ गरेको पुलिसले निर्धारित २० ओभरमा ५ विकेट गुमाएर १ सय ५५ रन जोड्यो ।

पुलिसका लागि ओपनर पवन सर्राफले अर्धशतकिय इनिङ्स खेले ।

पवनले ५४ बलमा ३ चौका र ३ छक्काको मदतमा ५९ रनको योगदान गरे ।

बागमतीका नन्दन यादव र रिजन ढकालले समान दुई/दुई विकेट हात पारे ।