अखबार नेपाल ट्रेन्डिङ

काठमाडौं: तेस्रो संस्करणको प्रधानमन्त्री कप एकदिवसीय क्रिकेट प्रतियोगिता अन्तर्गत आज दुई खेल हुनेछन् । त्रिवि क्रिकेट मैदानमा एपिएफ र सुदुर पश्चिम प्रदेशबीच प्रतिस्पर्धा हुनेछ भने मुलपानी क्रिकेट मैदानमा प्रदेश ५ र प्रदेश ३ बीच प्रतिस्पर्धा हुनेछ ।

प्रतियोगिता अन्तर्गत आईतबार भएको खेलमा त्रिभुवन आर्मीले दोस्रो जित निकालेको छ । किर्तिपुरस्थित त्रिवि क्रिकेट मैदानमा प्रदेश १ लाई १ सय १३ रनले पराजित गर्दै आर्मीले प्रतियोगितामा दोस्रो जित दर्ता गरेको हो । आर्मीले प्रस्तुत गरेको दुइ सय पाँच रनको लक्ष्य पछ्याएको प्रदेश एक २६ दशमलब ५ ओभरमा ९१ रनमा समेटियो ।

टस जितेर पहिला ब्याटिङ गरेको आर्मीले ४५ दशमलब ३ ओभरमा सबै विकेट गुमाएर २ सय ४ रन बनाएको थियो ।

यस्तै आईतबार भएको अर्को खेलमा नेपाल पुलिसले विजयी सुरुवात गरेको छ । मुलपानी क्रिकेट मैदानमा कर्णाली प्रदेशलाई ९४ रनले पराजित गर्दै पुलिसले विजयी सुरुवात गरेको हो । पुलिसले प्रस्तुत गरेको १ सय ८६ रनको लक्ष्य पछ्याएको कर्णाली प्रदेश २७ ओभरमा ९१ रनमा समेटियो । टस जितेर पहिले ब्याटिङ गरेको पुलिसले ४१ ओभरमा सबै विकेट गुमाएर १ सय ८५ रन बनाएको थियो ।