अखबार नेपाल ट्रेन्डिङ

एजेन्सी: च्याम्पियन युभेन्ट्स इटालियन सिरी ‘ए’ फुटबलको अन्तिम खेलमा पराजित भएको छ । आईतबार राति भएको सिजनको अन्तिम खेलमा युभेन्ट्स साम्पडोरियासंग २-० ले पराजित भएको हो ।

घरेलु मैदानमा साम्पडोरियालाई जित दिलाउन ग्रेगोइरे डेफ्रेल र गिन्लुका कप्रारीले एक एक गोल गरे । पहिलो हाफ गोलरहित बराबरीमा सकिएको खेलको दोस्रो हाफमा दुई गोल गर्दै साम्पडोरियाले जित निकालेको हो । खेलको ८४ औं मिनेटमा डेफ्रेलले गोल गर्दै साम्पडोरियालाई सुरुवाती अग्रता दिलाएका थिए । त्यसपछि खेलको ९० औं मिनेटमा कप्रारीले गोल गर्दै घरेलु टोलीलाई जित दिलाए ।

स्टार स्ट्राइकर क्रिस्टियानो रोनाल्डोबिना मैदान उत्रिएको युभेन्ट्सले सिजनको अन्तिम खेलमा उत्कृष्ट प्रदर्शन गर्न सकेन । बल पोजिसनमा पकड जमाएपनि युभेन्ट्स गोल गर्न असफल भएको थियो । हारसंगै च्याम्पियन युभेन्ट्सले सिजनको खराब अन्त्य गरेको छ । यसअघि नै च्याम्पियन बनेको युभेन्ट्सले यस सिजन ३८ खेलबाट ९० अंक जोड्यो । ५३ अंक जोडेको साम्पडोरिया नवौं स्थानमा रह्यो ।