रियल म्याड्रिड युइएफए च्याम्पियन्स लिगको नकआउट चरणमा प्रवेश
वि.सं.२०७८ मंसिर ९ बिहीवार ०७:१८
एजेन्सी: रियल म्याड्रिड समूह चरणको एक खेल बाँकी छँदै युइएफए च्याम्पियन्स लिगको नकआउट चरणमा प्रवेश गर्न सफल भएको छ ।
घरेलु टोली सेरिफलाई ३–० ले पराजित गर्दै रियलले अन्तिम १६ मा स्थान पक्का गरेको हो । रियलसँगको हार तथा अर्को खेलमा इन्टर मिलानको जितले सेरिफको नकआउट चरण पुग्ने सम्भावना सकिएको छ ।
खेलको सुरुवातदेखि नै घरेलु टोलीलाई दवावमा राखेको रियलले ३०औं मिनेटमा गोलको खाता खोलेको थियो । डेभिड अलाबाले फ्रिकिकमार्फत सिधै गोल गर्दै रियललाई १–० को अग्रता दिलाएका थिए ।
पहिलो हाफको इन्ज्युरी समयको थप गरिएको पहिलो मिनेटमा टोनी क्रुसले गोल गर्दै रियलको अग्रता दोब्बर पारे । खेलको ५५औं मिनेटमा करिम बेन्जेमाले गोल गर्दै रियललाई ३–० ले अघि बढाए ।
जितसँगै रियलले पहिलो राउन्डमा भोगेको हारको बदला लिएको छ । गत सेप्टेम्वरमा रियल घरेलु मैदानमा २–१ ले स्तब्ध बनेको थियो ।
जितसँगै समूह ‘डी’ मा रियल ५ खेलबाट १२ अंक जोडेर शीर्षस्थानमा रहेको छ । दोस्रो स्थानमा रहेको इन्टर मिलानको १० अंक छ । पराजित सेरिफ ६ अंक जोडेर तेस्रो तथा साख्तर डोनेस्क १ अंक जोडेर पुछारमा छ ।
वि.सं.२०७८ मंसिर ९ बिहीवार ०७:१८