अखबार नेपाल ट्रेन्डिङ

एजेन्सी: च्याम्पियन्स लिग फुटबलको फाइनलमा ईङ्लिस क्लब टोटेनहम प्रवेश गरेको छ । सेमिफाईनलको दोस्रो लेगको खेलमा अजाक्सविरुद्व पुनरागमन जित निकाल्दै प्रिमियर लिग क्लब टोटेनहमले फाईनल यात्रा तय गरेको हो ।

लुकास मौराले दोस्रो हाफमा ह्याट्रिक पुरा गरेपछि टोटेनहमले अविश्वसनीय नतिजा सहित उपाधि भिडन्त पक्का गरेको हो । पहिलो लेगको खेलमा १-० ले पराजित टोटेनहम बुधबार राति पहिलो हाफसम्म समेत २-० ले पछाडी परेको थियो ।

आयाक्सले खेलको पहिलो हाफमा उत्कृष्ट प्रदर्शन गर्दै फाइनलको यात्रा बलियो बनाएको थियो । खेलको पाँचौ मिनेटमा कप्तान माथिस डे लिटले आयाक्सलाई सुरुवाती अग्रता दिलाएका थिए । पहिलो हाफ सकिन १० मिनेट समय बाँकी छँदा हाकिम जिएकले आयाक्सको अग्रता दोब्बर पारे । पहिलो हाफ सकिँदा समग्रमा ३-० ले अगाडी रहेको आयाक्स दोस्रो हाफमा भने सम्हालिन सकेन ।

मौराले ५५ औं मिनेटमा डेले आलीको पास सदुपयोग गर्दै टोटेनहमलाई खेलमा फर्कने संकेत देखाए । त्यसको ४ मिनेटपछि नै उनले पेनाल्टी क्षेत्रभित्र रिबाउन्डमा आएको बललाई गोलमा परिणत गरे । खेलको ५ मिनेट थप गरिएको इन्ज्युरी समयको अन्तिम मिनेटमा मौराले ह्याट्रिक पुरा गर्दै टोटेनहमलाई पहिलो पटक फाइनल पुर्याए ।

यस जितसँगै टोटेनहमले लिभरपुलसँग च्याम्पियन्स लिगको फाइनल पक्का गरेको छ । मंगलबार भएको पहिलो सेमिफाइनलमा लिभरपुलले बार्सिलोनालाई उत्कृष्ट पुनरागमन गर्दै समग्रमा ४-३ ले पराजित गरेको थियो ।