अखबार नेपाल ट्रेन्डिङ

काठमाडौं: अखिल नेपाल फुटबल संघ एन्फाले एन्फा दिवसको अवसरमा आयोजना गरेको अवार्ड कार्यक्रममा विशेष योगदान खेलाडी पुरुष तर्फ जुमानु राईले र महिला तर्फ अनु लामाले जितेकी हुन् । दुबै विजयी खेलाडीलाई जनही १५/१५ लाख नगद सहित सम्मान गरिएको छ ।

महिला राष्ट्रिय टोलीका कप्तान समेत रहिसकेकी अनुले नेपालका लागि ३३ गोल गरेकी छिन् । उनी सशस्त्र प्रहरीको एपीएफ क्लबकी कप्तान पनि हुन् । जुमानुले पनि राष्ट्रिय टोलीका लागि खेल्दै अहिलेसम्म ९ गोल गरेका छन् । यसै वर्षबाट मनाउन सुरु गरेको एन्फा दिवसको अवसरमा आयोजित अवार्ड कार्यक्रममा अभिषेक रिजाल र मञ्जली कुमार योञ्जनले बर्षको उदयमान खेलाडीको अवार्ड प्राप्त गरेका छन् । यस्तै बर्षको उत्कृष्ट पुरुष रेफ्रीबाट लव खत्री र महिला रेफ्रीमा अस्मिता मानन्धरले अवार्ड जितेका छन् ।

बर्ष उत्कृष्ट प्रशिक्षकमा हरी खड्काले अवार्ड पाएका छन् । उनकै नेतृत्वमा नेपालले महिला साफमा फाइनल सम्मको यात्रा तय गरेको थियो । यस्तै अन्तराष्ट्रियस्तरमा खेल्ने व्यवसायिक खेलाडीको अवार्ड रोहित चन्द र किरण चेम्जोङले प्राप्त गरेका छन् । राष्ट्रिय टिमका दुई महत्वपुर्ण सदस्य रहेका रोहित र किरण अहिले विदेशी लिगमा अनुबन्धन भएका छन् ।

रोहितले इन्डोनेशियाको पर्सिजा जार्काता र किरणले माल्दिभ्सको टिसी स्पोर्टसबाट व्यवसायीक फुटबल करियर अघि बढाईरहेका छन् । यस्तै लाइफ टाईम एचीभमेन्ट अवार्डबाट भागिरथ आलेले प्राप्त गरे । भागिरथबाट प्रशिक्षित थुप्रै खेलाडीले राष्ट्रिय फुटबल टिमबाट आफुलाई स्थापित गरेका छन् । यस्तै मोरङ जिल्ला फुटबल संघले उत्कृष्ट जिल्ला संघ अवार्ड जितेको छ । मोरङ जिल्ला मै पाँचौ साफ महिला आयोजना भएको थियो । फुटबल क्लब अफ द इयर मनाङ मरस्याङदीले जितेको छ । मनाङले नेपालको प्रतिनिधित्व गर्दै एएफसी कप खेलिरहेको छ ।