अखबार नेपाल ट्रेन्डिङ

एजेन्सीः स्पेनिस कोपा डेल रे फुटबलको अन्तिम ३२ बाट रियल मड्रिड बाहिरिएको छ ।

गएराति तेस्रो श्रेणीको क्लब एल्कोयानोसँग अतिरिक्त समयमा २-१ ले पराजित हुँदै रियल बाहिरिएको हो ।

दोस्रो रोजाईका खेलाडी मैदान उतारेको रियलले ४५औं मिनेटमा अग्रता बनाएको थियो । इडर मिलिटाओले गोल गर्दै रियललाई अग्रता दिलाएका थिए ।

खेलको ८० औं मिनेटमा एल्कोयानोका जोस सोल्वेसले गोल गर्दै खेल १-१ गोलको बराबरीमा ल्याए ।

त्यसपछि निर्धारित समयमा थप गोल भएन र खेल अतिरिक्त समयमा लम्बिएको थियो ।

अतिरिक्त समयमा एल्कोयानो १० खेलाडीमा समेटियो । उसका रामोन लोपेज दोहोरो पहेलो कार्ड खादै मैदानबाट बाहिरिए ।

खेलको अन्तिम समयमा जुआनानले गोल गर्दै एल्कोयानोलाई २-१ को जित दिलाए ।