अखबार नेपाल ट्रेन्डिङ

काठमाडौं: इंग्लिस प्रिमियर लिग रोमाञ्चक मोडमा पुगेको छ । लिग अन्तर्गत आइतबारको खेलमा म्यानचेस्टर सिटीले बर्नलीलाई १-० ले पराजित गर्दै शीर्षस्थानमा उक्लिएको छ ।

बर्नलीको घरेलु मैदानमा भएको निकै प्रतिस्पर्धात्मक खेलको दोस्रो हाफमा सर्जियो अगुएरोले गरेको गोल नै निर्णायक सावित भयो । उनले पेनाल्टी क्षेत्र भित्रबाट गरेको प्रहार बर्नलीका डिफेन्डरले क्लियर गरेपनि गोललाइन टेक्नोलोजीले गोल भएको देखाएको थियो । जितसँगै सिटी लिभरपुललाई उछिन्दै शीर्षस्थानमा उक्लिएको छ ।

त्यसअघि लेस्टर सिटीले घरेलु मैदानमा आर्सनललाई ३-० ले पराजित गरेको थियो । गोलरहित रहेको पहिलो हाफपछि लेस्टरले आर्सनललाई दबाबमा राख्दै दोस्रो हाफमा ३ गोल गर्यो । उसका लागि फरवार्ड जेमी भार्डीले २ तथा युरी टिलेमान्सले सुरुवाती गोल गरे ।

गएराती नै भएको खेलमा चेल्सी र म्यानचेष्टर युनाइटेडले १-१ को बराबरी खेल्दै अंक बाँडेको छ । बराबरीपछि शीर्ष चारमा पर्ने अभियानमा दुवै क्लबलाई धक्का लागेको छ । घरेलु मैदान ओल्ड ट्राफोर्डमा ११औँ मिनेटमा हुवाँ माटाले गोल गर्दै युनाइटेडलाई अग्रता दिलाएका थिए । पहिलो हाफको ४३औँ मिनेटमा मार्कोस अलोन्सोले चेल्सीका लागि बराबरी गोल फर्काए ।

अंक तालिकामा सिटी ३६ खेलमा ९२ अंकसहित शीर्ष स्थानमा रहँदा लिभरपुल ९१ अंकसहित दोस्रो स्थानमा छ । तेस्रो स्थानमा रहेको टोटेनहमको ३६ खेलमा ७० अंक छ । चौथो स्थानमा चेल्सीको ३६ खेलमा ६८ अंक जोडेको छ । पाँचौ स्थानमा आर्सनलको ३६ खेलमा ६६ र म्यानचेस्टर युनाइटेडको ३६ खेलमा ६५ अंक छ ।।