अखबार नेपाल ट्रेन्डिङ

एजेन्सी: युभेन्ट्सले लगातार आठौं पटक इटालियन सिरी ‘ए’ फुटबलको उपाधि जितेको छ । गएराति भएको खेलमा फियोरेन्टिनालाई २-१ गोल अन्तरले पराजित गर्दै युभेन्ट्सले लगातार आठौं पटक उपाधि जितेको हो । घरेलु मैदानमा सुरुवाती अग्रता उल्टाएर युभेन्ट्सले जित निकालेको हो ।

युभेन्ट्सको जितमा एलेक्स सान्ड्रोले एक गोल गरे । युभेन्ट्सले एक आत्मघाती गोलको उपहार पाएको थियो । फियोरेन्टिनाका निकोला मिलेनकोभिकले गोल गर्दा जर्मन पिजेल्लाले आत्मघाती गोल गरे । खेलमा सुरुवाती अग्रता भने फियोरेन्टिनाले बनाएको थियो । मिलेनकोभिकले खेलको छैटौं मिनेटमा गोल गर्दै फियोरेन्टिनालाई अग्रता दिलाएका थिए ।

खेलको ३७ औं मिनेटमा सान्ड्रोले गोल गर्दै घरेलु टोलीलाई खेलमा फर्काए । त्यसपछि खेलको ८३ औं मिनेटमा जर्मनले आत्मघाती गोल गर्दा युभेन्ट्सले २-१ को जित निकाल्यो । योसंगै युभेन्ट्सले लगातार आठ सिजन सिरी ‘ए’ को उपाधि जितेर कीर्तिमान बनाएको छ । लिगको केहि खेल बाँकी रहदै उपाधि जित्ने क्रममा युभेन्ट्सले ३३ खेलबाट ८७ अंक जोडेको छ । युभेन्ट्स दोस्रो स्थानको नेपोली २० अंकले अघि रहेको छ । समग्रमा युभेन्ट्सको यो ३५ औं लिग उपाधि हो ।।