अखबार नेपाल ट्रेन्डिङ

काठमाडौं: बंगलादेशविरुद्ध मैत्रीपूर्ण खेलको तयारीमा रहेको नेपाली राष्ट्रिय फुटबल टोलीको बन्द प्रशिक्षण बिहीबारबाट सुरु हुने भएको छ ।

नेपाली टोली बंगलादेशसंग दुई खेलको अन्तर्राष्ट्रिय मैत्रीपूर्ण फुटबलको तयारीमा छ ।

मैत्रीपूर्ण तयारीका लागि अखिल नेपाल फुटबल संघ (एन्फा) ले बुधबार खेलाडीहरुलाई उपस्थितीको समय दिएको छ ।

नेपाली टोलीका व्यवस्थापक मधुसुधन उपाध्यायका अनुसार अनुसार प्रशिक्षणको तयारीमा रहेको एन्फाले बुधबार १२ बजेसम्ममा यसअघि राष्ट्रिय टोलीको प्रशिक्षणमा बोलाईएका सबै खेलाडीलाइ बोलाएको छ ।

बन्द प्रशिक्षणमा यसअघि विश्वकप २०२२ तथा एसिया कप छनोट अन्र्तगत दोस्रो चरणको घरेलु खेलका लागि एन्फाले ३४ खेलाडीलाई बोलाएको थियो ।

एन्फा स्रोतका अनुसार तीनै खेलाडीहरु मैत्रीपूर्ण खेलका लागि बंगलादेश जानेछन् ।

यसअघि विश्वकप छनोटको बन्द प्रशिक्षणका लागि बोलाइएका सबै खेलाडीलाईनै बुधबार १२ बजेसम्म अखिल नेपाल फुटबल संघ (एन्फा) को केन्द्रिय कार्यालयमा आउन भनिएको हो ।

यसअघि एन्फाले भदौ १ गतेदेखि राष्ट्रिय टोलीको प्रशिक्षण थाल्ने योजना बनाएको थियो, तर कोरोना महामारीका कारण सुरु नहुँदै अभ्यास रोकिएपछि खेलाडीहरु पनि घर फर्किएका थिए ।

साउनमा एन्फाले ३४ खेलाडीलाई बन्द प्रशिक्षणमा सहभागि हुन काठमाण्डौं बोलाएको थियो भने पीसीआर परिक्षणसमेत भइसकेको थियो । पीसीआर परिक्षण लगायतका सबै तयारी भए पनि सरकारले दोस्रो चरणको लकडाउन घोषणा गरेपछि अभ्यास सुरु हुन सकेको थिएन ।

नेपालले बंगालदेशसँग पहिलो अन्तर्राष्ट्रि मैत्रीपूर्ण खेल कात्तिक २८ गते खेल्ने छ । त्यस्तै दोस्रो खेल मंसिर २ गते खेल्ने तय भएको छ । नेपाली टोली कार्तिक २८ भन्दा एकसाता अघि बंगलादेश पुग्नेछ । नेपाली टोलीले दुवै खेल बंगबन्धु स्टेडियममा खेल्नेछ ।

कारोना भाइरसको महामारीपछि नेपालले पहिलोपटक अन्तर्राष्ट्रिय मैत्रीपूर्ण फुटबल खेल्न लागेको हो ।