अखबार नेपाल ट्रेन्डिङ

काठमाडौं: कतारमा जारी एएफसी यू-२३ च्याम्पियनसिप छनोटको अन्तिम खेलमा नेपाल अफगानिस्तानसँग पराजित भएको छ । कतारको दोहास्थित स्पोर्टस सिटी सेन्टरमा मंगलबार भएको खेलमा नेपाल अफगानिस्तानसंग २-० गोल अन्तरले पराजित भएको हो ।

अफगानिस्तानलाई जित दिलाउन सोलोमोन साह र अहमेद ओम्रानले एक एक गोल गरे । खेलको २४ औं मिनेटमा सोलोमोनले गोल गर्दै अफगानिस्तानलाई सुरुवाती अग्रता दिलाए । खेलको ३४ औं मिनेटमा अहमेदले गोल गर्दै अफगानिस्तानलाई २-० को जित दिलाए । अफगानिस्तानसंगको हारसंगै समूह ‘ए’ मा रहेको नेपाल जितविहीन बन्दै घर फर्किएको छ । नेपालले ३ खेलमा अंक जोडन सकेन र पुछारमा रहदै प्रतियोगिता सकाएको छ । अफगानिस्तान भने सान्त्वना जितसहित घर फर्किएको छ ।

अफगानिस्तानले ३ अंक जोड्यो । छनोटमा खराब प्रदर्शन गरेको नेपालले पहिलो खेलमा ओमानसंग १-० गोल अन्तरको हार व्यहोरेको थियो । यस्तै दोस्रो खेलमा कतारसंग ४-० ले पराजित भएको थियो । यस समूहबाट आयोजक कतार शीर्ष स्थानमा रहदै थाइल्याण्डमा अर्को बर्ष आयोजना हुने एएफसी यू-२३ च्याम्पियनसिपमा छनोट भएको छ ।