अखबार नेपाल ट्रेन्डिङ

काठमाडौं: नेपाली कांग्रेसले भदौ दोस्रो साताका लागि तय गरेको पार्टीको १४औं महाधिवेशन सार्ने तयारी गरेको छ ।

महाधिवेशन आगामी भदौ १६ देखि १९ सम्म काठमाडौंमा गर्ने कांग्रेसको कार्यतालिका थियो ।

सभापति शेरबहादुर देउवा निकट स्रोतका अनुसार मन्त्रिमण्डल विस्तार, कोभिड र क्रियाशील सदस्यताको विषयका कारण महाधिवेशन सार्ने तयारी भएको बुझिएको छ ।

पहिलो पटक सरकार बनेको, स्थानीय निर्वाचनको लागि केन्द्रित हुनुपर्ने र कोरोनाका कारण अहिले महाधिवेशन गर्न सम्भव नहुने भएकोले सार्नुपर्ने आवाज उठेको स्रोतको भनाई छ ।

कांग्रेसका प्रभावशाली  युवा नेताहरु गगन थापा, चन्द्र भण्डारी, विश्वप्रकाश शर्मा, गुरु घिमिरे, बद्री पाण्डेलगायतका नेताहरुको भेलाले भर्खरै सरकार गठन भएको, स्थानीय तहको चुनाव निकट आइसकेको, कोरोना अझै नसकिएको र सरकारले साउन १० गतेसम्म निषेधाज्ञा जारी गरेकोले अधिवेशनका कार्यक्रम अघि बढाउन नसक्ने निष्कर्ष निकालेको हो ।

कांग्रेसको तीनै गुटका नेताहरुलाई युवा नेताहरुले नै लबिङ गरेपछि महाधिवेशन कार्यक्रम सर्ने तयारी भएको स्रोतले बताएको छ ।

यसअघि पनि विभिन्न कारण देखाउँदै कांग्रेसको महाधिवेशन दुई पटक सरिसकेको छ ।

२०७२ फागुन तेस्रो साता कांग्रेसको १३औं महाधिवेशन भएको थियो । त्यसैको आधारमा २०७६ फागुनदेखि देउवाको चारवर्षे कार्यकाल पनि सकिएको छ ।

विधान अनुसार एक वर्ष म्याद थप गरेर २०७७ फागुन पुर्याएको थियो । त्यो समयमा पनि महाधिवशेन हुन सकेन ।

त्यसपछि संवैधानिक व्यवस्था अनुसार थप ६ महिना कार्यकाल थपिएको थियो त्यो म्याद यही भदौ २३ मा सकिँदैछ ।