अखबार नेपाल ट्रेन्डिङ

काठमाडौं:   भारतीय निर्माण कम्पनीको चरम लापरबाहीले गर्दा राँके–रवि–भेँडेटार जोड्ने सडक हिँडिनसक्नु बनेको छ । प्रधानमन्त्री केपी शर्मा ओलीले कालोपत्रेको शिलान्यास गरेको सडक हिँडिनसक्नु बनेको हो ।

प्रधानमन्त्री ओलीले पूर्वी पहाडी जिल्ला पाँचथरको राँकेदेखि धनकुटाको भेँडेटार जोड्ने सडक निर्माण भएको दुई दशकपछि कालोपत्रे गर्ने योजनासहित २०७५ पुसमा शिलान्यास गरेका थिए ।

भारतको लखनउस्थित एप्को इन्फ्राट प्रालिले तीन वर्षभित्र निर्माण सम्पन्न गर्ने गरी कालोपत्रेको जिम्मा लिएको छ । भारतीय निर्माण कम्पनीले चरम लापरबाही गर्दा सडकको अवस्था झन् हिँडिनसक्नु बनेकोले स्थानीयवासी निराश बनेका छन् ।

बर्खा लागेसँगै पानी जमेर सडक कतै हिलाम्मे र कतै पोखरीजस्तै भएकाले सवारी साधन सञ्चालनमा समेत कठिनाइ भएको छ । सडकका विभिन्न खण्डमा हिलोमा फसेका सवारी साधनलाई स्काभेटरको सहयोगमा निकाल्नुपर्ने बाध्यता रहेको छ ।

कुल १०० किलोमिटर लामो सडक अहिलेसम्म पाँचथरतर्फको २ किलोमिटर र धनकुटातर्फको राजारानी र बुधबारे खण्डको कुल चार किलोमिटर ग्राभेल गर्नेबाहेक अन्यत्र माटोको काममात्र भएको बताए । राँके–रवि, रवि–बुधबारे, बुधबारे–भेँडेटार गरी तीन भागमा विभाजित गरेर काम सञ्चालन हुँदै आएको सडकमा २१० वटा स्लाप कल्भर्ट, ३२० वटा होम पाइप कल्भर्ट रहनेछन् ।

इलाम र पाँचथरको सिमाना राँकेबाट महाभारत डाँडा हुँदै मोरङसँगै धनकुटाको भेँडेटारसम्म पुग्ने यो मार्ग कालोपत्रेका लागि तीन अर्ब ६५ करोड ८४ लाख ९५ हजार ५७२ रुपैयाँ रकम लागत अनुमान छ, जसमा एक्जिम बैङ्क अफ इन्डियाको ८७ प्रतिशत र नेपाल सरकारको १३ प्रतिशत लागत रहने छ ।

यो पनी पढ्नुहोस् :

सुदूरपश्चिम प्रदेशमा यो वर्ष ८.४१ प्रतिशतले बढी धान रोपाइँ