अखबार नेपाल ट्रेन्डिङ

काठमाडौं:  सुदूरपश्चिम प्रदेशमा यो वर्ष ८.४१ प्रतिशतले बढी धान रोपाइँ भएको छ । कोरोना महामारीका कारण शहरबाट घर आएका युवा गाउँमै रहेका कारण बाँझो जमिनमा रोपाइँ गरिएको छ ।

प्रदेशभर कुल एक लाख ८५ हजार ८४७ हेक्टर क्षेत्रफलमा धान रोपाइँ गरिदै आएकोमा हालसम्म ५८ हजार ३६८ हेक्टर जमिनमा धान रोपाइँ सम्पन्न भएको सुदूरपश्चिम प्रदेश कृषि निर्देशनालय दिपायलले जनाएको छ ।

यो वर्ष समयमै मनसुन शुरु भएका कारण डोटीमा ४५ प्रतिशत, कैलालीमा ५५, कञ्चनपुरमा ३५, अछाममा ४५ बाजुरामा ५५, बझाङमा ४५, बैतडीमा ४५, दार्चुलामा ६२, डडेल्धुरामा ६० प्रतिसत धान रोपाइँ सम्पन्न भएको छ ।

सुदूरपश्चिम प्रदेशको धान उत्पादन हुने क्षेत्रफलको ४५.९५ प्रतिशत भूभागमा धान रोपाइँ सम्पन्न भइसकेको निर्देशनालयको तत्थ्याङकमा उल्लेख छ । प्रदेशमा  विगतदेखि बाँझो रहेका जमिनमा पनि यस वर्ष धान रोपाइँ गरिएको हो ।

यहाँका उच्च पहाडी र पहाडी क्षेत्रमा धान रोपाइँ छिट्टै भएको छ । ग्रामीण क्षेत्रका करीब धान रोपाइँ सकिएको छ भने पुरानो क्षेत्रीय सदरमुकाम दिपायल, पिपल्ला, घोलतडा लगायतका क्षेत्रमा रोपाइँ चलिरहेको निर्देशनालयले जनाएको छ ।

जिल्लामा विशेषगरी असारको पहिलो सातादेखि साउनको अन्तिम सातासम्म रोपाइँ हुन्छ । यही असार १० गतेसम्म भएको रोपाइँको तुलनामा सुदूरपश्चिम प्रदेशमा यो वर्ष ८.४१ प्रतिशतले बढी भएको बताइएको छ । यो वर्ष राम्रो धान उत्पादन हुने निर्देशनालयले जनाएको छ ।

नेपालमा कुल १३० जातका धान उत्पादन हुँदै आएको छ । सुदूरपश्चिम प्रदेशमा नौवटै जिल्लाका किसानले प्राय गरी मार्सि, थापाचिनी, गुर्रा, ठेसे, हंसराज र पालपाली धान लगाउदै आएका छन् । यहाँको प्रसिद्ध धान जोरायले बासमती डोटीको जोरायल क्षेत्रमा मात्रै लगाउने र उत्पादन हुने गरेको निर्देशनालयले जनाएको छ ।

यो पनी पढ्नुहोस् :

देशभर धान रोपाईं हुने क्षेत्रफलमध्ये २७ प्रतिशतमा धान रोपाइँ सम्पन्न