अखबार नेपाल ट्रेन्डिङ

काठमाडौं: बालुवाटारस्थित ललिता निवास जग्गाकाण्डमा मुछिएका शोभाकान्त ढकालको घरमा बम विस्फोट भएको छ । काठमाडौं प्रहरी प्रवक्ता डिएसपी होविन्द्र बोगटीका अनुसार नागार्जुन नगरपालिका वडा नम्बर १ को नर्सरी चोकमा रहेको ढकालको घरमा बम विस्फोट भएको हो । बालुवाटरको १ सय ४३ रोपनी जग्गा खरिद गर्नेमा ढकाल पनि एक हुन् ।

विस्फोटले घरको सिसा फुटको छ भने गेटमा समेत क्षति पुगेको छ । प्रहरीले अज्ञात समूहले बम विस्फोट गराएको बताएको छ । काठमाडौं प्रहरी प्रमुख एसएसपी उत्तमराज सुवेदीले विस्फोटको विषयमा अनुसन्धान भइरहेको जानकारी दिनुभएको छ । विस्फोटमा कुनै मानवीय क्षति भने भएको छैन । बिस्फोट आसपासका क्षेत्रमा नेत्रविक्रम चन्द ‘विप्लव’ समूहको पर्चा भेटिएको छ । उक्त पर्चामा बालुवाटारको जग्गा कब्जा गर्नेलाई पार्टीले कारवाही गर्ने उल्लेख गरिएको छ ।

विप्लवको पर्चामा ललिता निवासको जग्गा आफ्नो पार्टीले कब्जा गरेको जनाएको छ । पार्टीले अर्को निर्णय नगरेसम्म ललिता निवासको जग्गा कब्जा गरेको दाबी विप्लव समुहको छ । यो जग्गा कसैले कारोबार गर्न नपाउने दाबी पर्चामा गरिएको छ ।