अखबार नेपाल ट्रेन्डिङ

पोखरा: ताप्लेजुङमा भएको हेलिकोप्टर दुर्घटनामा परी निधन भएका संस्कृति पर्यटन तथा नागरिक उड्डयनमन्त्री रवीन्द्र अधिकारीको राजकीय सम्मानका साथ अन्त्येष्टि गरिएको छ ।

अधिकारीको पार्थिव शरीरमा उनका जेठा छोरा विराजले दागबत्ती दिनुभएको थियो भने नेपाली सेनाको एक टुकडीले ६१ तोपको सलामी दिएको थियो । अन्तिम संस्कार अघि श्रद्धाञ्जली अर्पण गर्न अधिकारीको पार्थिब शरीर पोखरा नयाँबजारस्थित प्रदर्शनी केन्द्रमा रोखिएको थियो । विभिन्न स्थानबाट भेला भएका सर्वासाधारण, राजनीतिक दलका स्थानीय नेता-कार्यकर्ता, सरकारी कर्मचारीलगायतले मन्त्री अधिकारीको पार्थिव शरीरमा माल्यार्पण गरी श्रद्धाञ्जली व्यक्त गरेका थिए ।

अधिकारीलाई अन्तिम श्रद्धाञ्जली दिन संघीय सरकारका उपप्रधानमन्त्री एवं रक्षामन्त्री ईश्वर पोखरेल, मन्त्रीहरु गोकर्ण विष्ट, पद्मा अर्याल, भानुभक्त ढकाल, नेकपाका महासचिव विष्णु पौडेल, प्रवक्ता नारायणकाजी श्रेष्ठ, नेता वामदेव गौतम, योगेश भट्टराई, कांग्रेस नेता चन्द्र भण्डारीलगायत पोखरा पुग्नुभएको थियो । मन्त्री अधिकारीको पार्थिव शरीरमा उपप्रधानमन्त्री पोखरेल र गण्डकी प्रदेशका मुख्यमन्त्री पृथ्वीसुब्बा गुरुङले राष्ट्रिय झण्डा र नेकपाका नेता श्रेष्ठ र गौतमले पार्टी झण्डा ओढाएर सम्मान व्यक्त गर्नुभएको थियो ।

अधिकारीलाई श्रद्धाञ्जली दिन गाउँ-गाउँबाट सर्वसाधारण पोखरा आएका थिए । देशका लागि धेरै योगदान गर्नसक्ने विश्वास गरिएका नेता गुमाएको भन्दै श्रद्धाञ्जलीमा सहभागीले कास्कीले अधिकारीजस्तो नेता मुस्किलले पाउने भन्दै दुःख व्यक्त गरेका थिए ।

अधिकारीको पार्थिब शरीर दिउँसो एक बजे पोखरा पुराइएको थियो । कास्कीको पोखरा महानगरपालिका-३३ भरतपोखरीको जामुनाबोटमा २०२६ सालमा जन्मिनु भएका अधिकारी २०७४ सालमा भएको संसदीय निर्वाचनमा कास्की-२ बाट प्रतिनिधिसभा सदस्य निर्वाचित हुनुभएको थियो ।