अखबार नेपाल ट्रेन्डिङ

काठमाडौं: त्रिभुवन अन्तर्राष्ट्रिय विमानस्थलको धावनमार्ग र ट्याक्सी जिर्णोद्धारको दोस्रो चरणको कामका लागि दैनिक ७ घण्टा बन्द हुँदै आएको विमानस्थल सञ्चालनयोग्य भएको हो । ट्याक्सी वे र रनवे जोड्ने लिंक रोडको जिर्णोद्धारको दोस्रो चरणमा रनवे सेन्टरलाइन लाइट फेर्ने काम सकिएको छ ।

काम सम्पन्न गरी निर्माण कम्पनीले नेपाल नागरिक उड्डयन प्राधिकरणलाई आयोजना हस्तान्तरण गर्दैछ । यससँगै अब विमानस्थल दैनिक २१ घण्टा सञ्चालनका लागि योग्य भएको विमानस्थलले जानकारी दिएको छ । सरकारले त्रिभुवन विमानस्थललाई २४ सै घण्टा सञ्चालनको घोषणा गरेको छ । त्रिभुवन अन्तर्राष्ट्रिय विमानस्थलमा करीव ४० वर्ष पुरानो पीच उप्काएर धावनमार्ग तथा ट्याक्सी वे जिर्णोद्धारको काम सम्पन्न भएको हो । यसबाट विमानस्थलको धावनमार्गमा हुने भौतिक क्षतिबाट उत्पन्न हुने जोखिम टरेको छ भने विमानस्थलमा अवतरण हुने जहाजको क्षमता समेत बढेको छ ।

सरकारको नीति तथा कार्यक्रम र बजेटमा समेत यो विषय उल्लेख थियो । संस्कृति, पर्यटन तथा नागरिक उड्डयन मन्त्रालयको प्राथमिकताका कार्यक्रममा पनि यसलाई समेटिएको छ । तर, नागरिक उड्डयन प्राधिकरण र विमानस्थलका उच्च अधिकारीहरु भने तत्काल २४ सै घण्टा सञ्चालन गर्न सम्भव नहुने बताएका छन् । त्रिभुवन विमानस्थल दैनिक १८ घण्टा सञ्चालनमा थियो । गत चैतमा जिर्णोद्धारको पहिलो चरणको काम शुरु हुनुअघि रातको समय सारेर २१ घण्टा चलाउने गरिएको थियो ।