अखबार नेपाल ट्रेन्डिङ

काठमाडौं: सरकारले नेपाली नोटमा नेपाल संवत् उल्लेख गर्ने तयारी अघि बढाउने भएको छ । बुधबार नेपाल संवत् ११४६ को अवसरमा भक्तपुरको मध्यपुर थिमीमा आयोजित कार्यक्रमलाई सम्बोधन गर्ने क्रममा प्रधानमन्त्री सुशीला कार्कीले यसबारे जानकारी गराएकी हुन् । उनले सम्बन्धित पक्षसँग परामर्श गरी प्रक्रिया अघि बढाउने प्रतिबद्धता जनाउँदै भनिन्, ‘नेपाल राष्ट्र बैंकद्वारा निष्काशन गरिने नोटमा नेपाल संवत् उल्लेख गर्ने विषयमा सम्बन्धित पक्षसँग परामर्श गरी प्रक्रिया अगाडि बढाउने प्रतिबद्धता व्यक्त गर्दछु ।’

प्रधानमन्त्री कार्कीले नेपाल संवत्का प्रवर्तक शंखधर साःख्वाको योगदानको स्मरण गर्दै गरिबी र ऋणमा डुबेका नागरिकहरूको ऋणमोचन गरी उनले लिएको निर्णय ऐतिहासिक भएको बताइन् । आजभन्दा ११४६ वर्षअघि, राजा राघवदेवको शासनकालमा साःख्वाले ऋणको भारबाट पीडित जनतालाई मुक्त गर्ने ऐतिहासिक निर्णय लिएको दिन नै नेपाल संवत्को शुभारम्भको आधार भएको उनले उल्लेख गरिन् । उनले साःख्वाको योगदानबाट सामाजिक एकता, त्याग र मानवीयताको बाटोमा हिँड्न सबैलाई प्रेरणा मिल्ने विश्वास व्यक्त गरिन् ।

नेपाल संवत्का प्रवर्तक शंखधरलाई वि.सं. २०५६ मा राष्ट्रिय विभूति घोषणा गरिएको थियो भने २०६५ कात्तिक ७ गतेदेखि नेपाल संवत्लाई राष्ट्रिय संवत् घोषणा गरिएको थियो ।