अखबार नेपाल ट्रेन्डिङ

काठमाडौं: पुष्पकमल दाहाल ‘प्रचण्ड’ नेतृत्वको वर्तमान सरकारबाट राम्रो काम नभएको र बजेट विनियोजन पनि समानुपातिक नगरेको भन्दै सत्ता पक्ष र विपक्षीहरूबाट सर्वत्र विरोध हुन थालेपछि नेकपा एमाले र नेपाली कांग्रेसका शीर्ष नेताबीच सरकार परिवर्तनको कसरतमा जुटेका हुन् ।

नेपाली कांग्रेस पछिल्लो समय एमाले अध्यक्ष केपी शर्मा ओली र दोस्रो तहका नेताहरुसँग संवाद अगाडि बढाइरहेको छ । दोस्रो तहका नेताहरूबीच भएको संवाद सकारात्मक भएपछि शीर्ष नेताको छलफल अगाडि बढेको हो । शनिबार र आइतबार पनि एमाले अध्यक्ष ओली र कांग्रेस सभापति शेरबहादुर देउवाबीच भेटवार्ता भएको हो । उनीहरुबीच सैद्धान्तिक रुपमा सहमति अगाडि बढिसकेको स्रोतको भनाई छ ।

स्रोतका अनुसार २/४ दिनभित्रै सत्ता समिकरण फेरबदल हुनेछ । उच्च स्रोतका अनुसार एमाले र कांग्रेसबीचको छलफलमा एमाले अध्यक्ष केपी शर्मा ओलीलाई प्रधानमन्त्री बनाएर अगाडि बढ्न दुबै दल सहमति भएको बताइएको छ । यस अगाडि शेखर कोइराल पक्षले एमालेसँग सहकार्य गर्नुपर्ने अभिव्यक्ति दिँदै आएका थिए तर, यस पटक भने देउवा आफैंले ओलीलाई प्रधानमन्त्रीमा प्रस्ताव गरेको स्रोतको भनाई छ । उनीहरुबीच संसद्को बाँकी आधा-आधा कार्यकाल सरकारको नेतृत्व गर्ने सहमति भएको बताइएको छ । केहि दिनभित्रै सानो मन्त्रिमण्डल बनाएर अगाडि बढ्न दुई दलभित्र गृहकार्य जारी रहेको छ ।