अखबार नेपाल ट्रेन्डिङ

काठमाडौं: नेपाल पर्यटन बोर्ड, नेपालस्थित चीनियाँ दूतावास, लुम्बिनी विकास कोष, नेपाल ओलम्पिक कमिटी र प्रदेश खेलकुद परिषद् लुम्बिनीको आयोजना तथा नेपाल ओभरसिज चाइनिज एसोसिएसन, लुम्बिनीस्थित झोङ हुआ गुम्बा र लुम्बिनी होटल एसोसिएसनसंगको सहआयोजना तथा लुम्बिनी बौद्ध विश्वविद्यालय, ग्रीनरोड तथा छांगन अटोमावाइलको सहकार्यमा यही चैत्र २३ र २४ गते लुम्बिनी अन्तर्राष्ट्रिय शान्ति महोत्सव २०२४ सम्पन्न भएको छ ।

लुम्बिनीलाई विश्व शान्ति र सांस्कृतिक पर्यटन गन्तव्यको रूपमा विश्वव्यापी रूपमा प्रवर्द्धन गर्नुका साथै नेपाल र चीनबीचको जनस्तरको सद्भाव र सम्बन्धलाई अझ प्रगाढ बनाउने अपेक्षाका साथ आयोजना गरिएको यस कार्यक्रममा लुम्बिनी अन्तर्राष्ट्रिय शान्ति म्याराथन, लुम्बिनी अन्तर्राष्ट्रिय ध्यान दिवस, र लुम्बिनी शान्ति कन्सर्ट गरी तीनवटा प्रमुख कार्यक्रमहरू समावेश रहेका थिए ।

जस अन्तर्गत चैत्र २३ गते साँझ ‘विकास र शान्तिका लागि अन्तर्राष्ट्रिय खेलकुद दिवस’ को उपलक्ष्यमा सम्वाद कार्यक्रम तथा २४ गते बिहान ७ बजे लुम्बिनी पवित्र उद्यानमा सयजना भिक्षु, भिक्षुणी र अन्य करिब ४ सय सहभागीहरुसंग अन्तर्राष्ट्रिय ध्यान दिवस आयोजना गरिएको थियो भने २५ गते सांझ विश्व शान्ति र सद्भावको लागि आह्वान गर्दै पीस कन्सर्ट आयोजना गरिएको थियो ।

प्रतियोगिता अन्तर्गत पुरुषतर्फ अन्तर्राष्ट्रिय मापदण्ड अनुसारको ४२ किलोमीटर बढीको म्याराथन, महिलातर्फ २१ किलोमिटर दुरीको हाफ म्याराथन दौड र पाँच किलोमिटरको रोड रेस र विद्यालयका छात्र छात्राको लागि तीन किलोमिटरको वाकाथन पनि प्रतियोगितामा समावेश गरिएको थियो ।

पीस कन्सर्टमा नेपाली गायिका आनी छोयिङ डोल्मा सहित चिनियाँ कलाकारको प्रस्तुती

पीस कन्सर्टमा विश्वप्रसिद्ध नेपाली गायिका आनी छोयिङ डोल्माले बौद्ध भजन र भजन सहित आफ्ना १० वटा लोकप्रिय गीतहरू प्रस्तुत गरेकी थइन भने प्रसिद्ध चिनियाँ लोक गायिका वुलान तुयाले आफ्ना लोकप्रिय गीतहरू ‘हाई अन द ग्रासल्याण्ड लुकिंग एट बेइजिङ’ र ‘हर्स हार्नेसिङ’ प्रस्तुत गरेकी थिइन । प्रसिद्ध गुकिन वाद्यबाधक लु निङले प्राचिन चिनीयाँ बाद्यवाधन गुकिनबाट संगीत प्रस्तुत गरेकी थिइन भने यस्तै सो अवसरमा नेपाली कलाकार मनोज सिंह, ग्रामी मनोनीत, गोपाल रसाइलीले, सञ्जय श्रेष्ठ र प्रिन्स नेपालीले प्रस्तुति दिएका थिए । यस्तै लुम्बिनीका कलाकारहरूले नेपालको तराईको समृद्ध संस्कृति झल्काउने ‘बिरहा’ र ‘ढेलुवा’ नृत्य प्रस्तुत गरेका थिए ।

कार्यक्रममा नेपालका लागि महामहिम राजदूत चेन सोङ चिनियाँ दूतावास, लुम्बिनी विकास कोषका सदस्य सचिव सानु राजा शाक्य, नेपाल पर्यटन बोर्डका निमित्त प्रमुख कार्यकारी अधिकृत नन्दिनी लाहे–थापाले लुम्बिनीले विश्व शान्ति र विकासका लागि खेल्न सक्ने भूमिका धारणा राखेका थिए । ‘लुम्बिनी अन्तर्राष्ट्रिय शान्ति महोत्सव’ को चैत्र २३ गते उपप्रधान तथा परराष्ट्रमन्त्री नारायणकाजी श्रेष्ठले उद्घाटन गरेका थिए ।