अखबार नेपाल ट्रेन्डिङ

काठमाडौं: नयाँ मन्त्रिमण्डल गठनका लागि प्रधानमन्त्री निवास बालुवाटारमा नेकपा एमाले, नेकपा माओवादी केन्द्र र राष्ट्रिय स्वतन्त्र पार्टी (रास्वपा)को बैठक बसिरहेको छ । नेपाली कांग्रेस, नेकपा माओवादी केन्द्र, जसपा, नेकपा एकीकृत समाजवादी सहितको गठबन्धन टुटेर नयाँ समीकरणको सरकार बन्ने लागेको हो ।

बैठकमा एमालेको तर्फबाट अध्यक्ष केपी शर्मा ओली, महासचिव शंकर पोखरेल र उपाध्यक्ष विष्णु पौडेल सहभागी छन् । माओवादीबाट अध्यक्ष पुष्पकमल दाहाल प्रचण्ड, वरिष्ठ उपाध्यक्ष नारायणकाजी श्रेष्ठ र उपमहासचिव वर्षमान पुन सहभागी छन् । रास्वपाबाट सभापति रवि लामिछाने बैठकमा सहभागी छन् ।

पछिल्लो सहमति अनुसार एमाले, रास्वपा र जसपाबाट एक-एकजना जनाले आजै मन्त्रीमा शपथ लिने तयारी गरेका हुन् । एमालेले पदम गिरीलाई मन्त्रीमा पठाउने तयारी गरेको छ । माओवादी, रास्वपा र जसपाले मन्त्री टुंग्याउन बाँकी छ । अहिलेको बैठकमा जनता समाजवादी पार्टी जसपा बैठकमा सहभागी छैन् । यद्यपी उसले आकस्मिक बैठक बोलाएको छ ।