अखबार नेपाल ट्रेन्डिङ

काठमाडौं: राष्ट्रपति रामचन्द्र पौडेल सातौँ बागलुङ महोत्सवको उद्घाटनका लागि बागलुङ पुगेका छन् । राष्ट्रपति पौडेल नेपाली सेनाको हेलिकप्टरबाट बागलुङ पुगेका हुन् ।

बागलुङ नगरपालिका–४ उपल्लाचौरस्थित नेपाली सेनाको गणमा पौडेल अवतरण भएपछि प्रमुख जिल्ला अधिकारी (सीडीओ) खगेन्द्र रिजालले स्वागत गरेका थिए । यस अवसरमा उनले बागलुङ कालिका मन्दिरको दर्शन तथा पूर्जाअर्चना गर्ने कार्यक्रम छ । मन्दिरको दर्शनलगत्तै बागलुङ नगरपालिका–४ कुँडुलेस्थित राष्ट्रपति पौडेलले शालिग्राम सङ्ग्रहालयको अवलोकन गर्ने कार्यक्रम रहेको उद्योग वाणिज्य सङ्घ बागलुङले जनाएको छ ।

कोरोना सङ्क्रमणका कारण अघिल्लो पटक हुन नपाएको महोत्सव चार वर्षपछि फेरि हुन लागेको हो । यसअघि विसं २०७६ मा महोत्सव भएको थियो । महोत्सव आजदेखि पुस २१ गतेसम्म चल्नेछ । महोत्सवमा १२० भन्दा बढी स्टल रहने छन् । महोत्सवको करिब ७ लाख दर्शकले अवलोकन गर्ने अनुमान छ ।

महोत्सवमा खुला महिला तथा पुरुष भलिबल प्रतियोगिता, खुला रिले दोहोरी तथा लाइभ दोहोरी गीत, खुला भजन प्रतियोगिता र युवा उद्यमी सम्मेलन हुने जनाइएको छ। मेलामा सशस्त्र द्वन्द्वमा घाइते भएका नागरिकलाई निःशुल्क प्रवेशको सुविधा रहेको सङ्घले जनाएको छ ।